"Z365" edo "Zinemaldia urte osoan" Zinemaldiaren apustu estrategiko berria da, non talentu berrien bilaketa, laguntza eta garapena (Ikusmira Berriak, Nest); formakuntza eta zinema-ezagutzen transmisioa (Elias Querejeta Zine Eskola, Zinemaldia + Plus, Zinemagileen elkarrizketa); eta ikerketa, dibulgazioa eta pentsamendu zinematografikoa (Z70 proiektua, Pentsamendua eta eztabaida, Ikerketa eta argitalpenak) elkartzen diren.
Beste bi film aukeratu dira Zuzendari Berriak saila osatzeko. Horrenbestez, mundu osoko zinemagileen hamasei lehen edo bigarren lan bildu dira sail honetan.
Martijn Maria Smits-ek (Breda, Herbehereak, 1980) bere bigarren film luzea aurkeztuko du: Waldstille. Filmean, protagonista bere sorlekura itzuliko da, bere neska hil zuen istripua eragiteagatik espetxean denboraldi bat eman ostean. Jaioterrian haren aita-amaginarrebak bizi dira, eta beraiek dute protagonistaren alabaren zaintza.
Smitsek Herbeheretako Zinema Akademian ikasi bitartean egindako Otzenrath film laburrak hainbat sari irabazi zituen. Ondorioz, bere lehen film luzea egin ahal izan zuen Smitsek: C’est déjà l’été, Rotterdameko zinema-jaialdirako aukeratua. Herbeheretar zuzendaria Anvers telebista-ekoizpenaren egilea da, halaber; hari esker, Urrezko Fipa lortu zuen Biarritzen drama-kategorian.
Teesklejad / Pretenders Vallo Tomla estoniar zuzendariaren lehen film luzea da. Tomla bere herrialdeko zinemagintzaren esperantza bihurtu da zenbait film labur egin ostean. Teesklejad Estonia, Lituania eta Letoniaren arteko koprodukzio bat da; drama psikologiko bat non bikote bat aztertzen baita, erabaki zail bat hartu ostean.
Bi film horiekin itxi da Kutxabank-Zuzendari Berriak saria lortzeko lehiatuko diren filmen zerrenda. Sail hau Zinemaldiak zinemagintzako talentu berrien alde egindako apustu bat da. Kutxabank-Zuzendari Berriak saria nazioarteko epaimahai batek ematen du eta 50.000 euroko diru-sari bat darama, zuzendariarentzat eta filmaren Espainiako banatzailearentzat. Sail honetako filmak Gazteriaren EROSKI saria irabazteko hautagai dira, halaber; 18tik 25era bitarteko 300 gaztez osatutako epaimahai batek aukeratuko du irabazlea.