Gure garaiko sukaldarien artean, zalantzarik gabe, Andoni Luis Adurizek du eragin handienetakoa. Sukaldean, eboluzioaren eta diziplinartekotasunaren alde egin du beti apustu; horrek aurrez ezarritakoaren mugez harago joatera eta sukaldean bihurria izatera eraman du. Basque Culinary Center Fundazioaren Patronatuko, Berrikuntzarako Ibermatika Institutuko eta Innobasqueko Zuzendaritza Batzordeko kide izateak Adurizen jarrera diziplina anitzekoa sendotu du; horrez gain, sukaldaritza-berrikuntzaren eta horrekin erlazionatutako sektoreen arteko lotura ahalbidetzen du. La Fura dels Baus taldearekin antzerki-jardueretan parte hartu eta dokumentalak eta argitaletxe proiektu paregabeak sortu eta sustatu izanak agerian uzten du Adurizek moldakortasun handia duela sortzaile gisa, eta jarrera ausarta duela aurrez ezarritako mugekiko. Dudarik gabe, liluratzea da Adurizen helburua, zentzumen guztiak barruan hartuko dituen esperientzia baten bitartez. Mugaritz proiektuari, bere apustu arriskutsuenari eta onenari, 1998an heldu zion, bakarka, eta 2006 urtetik bi Michelin izar ditu. Mugaritz I+D-ren sinonimo bilakatu da; han, alde batera utzi dute jatetxe hitza. Adurizek berak aitortu moduan: «zerbait gehiago da». Mugaritzen, abangoardiaren eta betiko euskal sukaldaritzaren arteko konbinazio ezinhobea lortu dute. Sukaldean urratutako bideak hainbat arrakasta biltzera eraman du Adurizen jatetxea: 2006 urtetik, munduko hamar jatetxe onenen artean dago, Restaurant aldizkariaren arabera. 

Mikelek hurbiltasun-bokazioz zuzentzen du Ni neu jatetxeko sukaldea. Eta bete-betean lortu du: keinu tradizionaletan oinarrituta, teknika garaikideak eta oso pertsonalak erabiltzen ditu sukaldean. Emaitza bikaina eta ulergarria da, eta bat dator Ni neu jatetxearen inguru bereziarekin.

Zuriñe García sukaldari gazte bizkaitar bat da, eta Galdakaoko Andra Mari jatetxe prestigiotsuko sukaldariburua duela bost urtetik, bere merezimenduz. Michelin izar bat duen emakumezko sukaldari bizkaitar bakarra da. Galdakaoko Ostalaritza Eskolan jaso zuen prestakuntza; ondoren, euskal sukaldaritzako chef ospetsuenekin hartu du eskarmentua: José Miguel Olazabalaga, Eneko Atxa, Andoni Arrieta, Martin Berasategui eta Hilario Arbelaitzekin, besteak beste. Maisu bikain horiek beren arrastoa utzi dute sukaldari gazteak sukaldea ulertzeko duen moduan. Bere lanek sentikortasun handia transmititzen dute. Bere sukaldaritzak, etengabeko eboluzioan, tradizioa eta modernotasuna uztartzen ditu.

2003an, Galizian, bertako sukaldaritza eraldatzeko indarrak batu zituzten zenbait sukaldarik: Grupo Nove elkarte paregabea sortu zen horrela. Bederatzi gazte, konturatuta, Espainiako beste eskualde batzuetan gailentzen ari zen sukaldaritza-berrikuntzaren atzealdean geratzen ari zela Galizia. Katalunia eta Euskadi ez bezala, Galizia primerako lehengaiak edukitzeagatik zen ezaguna, ez, ordea, bere sukaldaritza-teknikengatik edo bertako sukaldarien talentuagatik. Zerbait aldatu behar zen, bada.

Hala, ofizialki jaio zen Galiziako Sukaldaritza Berria eta, hamarkada batean, erabatekoa izan da aldaketa. Gaur egun, hogeitik gora sukaldari biltzen ditu Grupo Novek -besteak beste, Pepe Solla, Xosé Cannas, Yayo Daporta, Beatriz Sotelo, Javier Olleros...-, bai eta zortzi Michelin izar eta 19 Repsol eguzki ere.

Grupo Noveren sukaldaritzaren ezaugarri nagusia iragana ikertzeko zaletasuna da, modernotasunak atzean utzitako zaporeak berreskuratzea, eta garrantzi gutxikotzat jotako produktuei duintasuna ematea.

Jorge Muñoz Trujillon (Perú) jaio zen, 1985ean. Pakta-ko sukaldeburu gisa etorri da; zeregin horretan, Kyoko Ii japoniarrerekin batera aritzen da. Aurrez, Australian, Ibizan, Bartzelonako jatetxe begetariano batean eta 41º Experience jatetxean (non pastelgintzako laguntzailea eta produkzioburua izan baitzen) izan ditu esperientziak.
41º jatetxean zebilela, eta Pakta proiektuak itxura hartu bitartean, bi stage egin zituen, Gastón Acuriorekin bata, Astrid y Gastón jatetxean, eta Mitsuharu Tsumurarekin bestea, Maidon, gorabidean den nikkei sukaldaritzaren teknikak eta joerak ikasteko. 

Gaur egun, Adrià anaien Pakta jatetxea zuzentzen du Muñozek; 2013 ireki zituen ateak, eta 2014tik Michelin izar bat du.  Paktako sukaldean nikkei platerak prestatzen dira: hau da, Peruko tradizioaren eta aurreko mende hasieran ehunka immigrante japoniarrek berekin Perura eramandako eragin japoniarraren arteko fusiona.

Alejandro Ruiz Olmedo La Rayako herrixka batean jaio zen, Zimatlán de Álvarez udalerrian (Oaxaca). Mexikoko sukaldari finenetakoa da, eta Oaxacako eskualde-sukaldaritzari buruzko aditu ospetsuenetakoa mundu-mailan. Sukaldea duela konplize, Casa Oaxacan, mundua bereganatu du bertako eskualde-sukaldaritzaren bitartez; hori dela medio, bere burua berrasmatzen du, eta koloreak, usainak eta zaporeak fusionatuz mahaikidea harritzen.

El Celler de Can Roca jatetxeak eta Roca anaiek kozinatzeko gonbidapena luzatuko diote Alejandro Ruizi, Mexikoko sukaldaritza garaikideko chef adierazgarrienetako bati. Alejandro Cooking up a tribute filmean parte hartzen duten sukaldarietako bat da.

Mirador de Ulía jatetxean, Rubén Trincado sukaldariak sukaldaritza berritzailea proposatzen du, bat ere konplexurik gabea. Nolanahi ere, sukaldaritza tradizionalean errotuta dago. Hortik datorkio, bada, zapore eta usainekiko grina. Gainera, teknikarik aurreratuenak aplikatzen ditu mahaikideak plateraren osaketarekin harritzeko, baina, batik bat, zehaztasunarekin.

Gorka Txapartegi chefak Hondarribiko Alameda (Gipuzkoa) bere jatetxean dihardu: han garatzen du bere sukaldaritza, gozo mimatuz produktua eta bezeroari emanez lehentasuna, familiarteko lantalde batekin. Sari garrantzitsuekin saritutako sukaldaria izanik, Gorkak ez du inoiz ahazten etxe historiko bateko espiritua, produktua eta ekoizleak errespetatuz beti, eta bere lanean sukaldaritza garaikidearen joera berriekin eta modernotasunarekin uztartuz tradizioa.

Victor Wågman; Kolonbian jaioa, Suedian hazia. Kopenhageko Bror jatetxearen jabea eta sukaldeburua, Sam Nutter-ekin batera.  Lanean egin duen bidean, Michelin izarrak dituzten hainbat jatetxetan aritu da lanean mundu osoan. Bror ireki aurretik azkeneko lanpostuan, Noma jatetxeko sous-chef gisa jardun zuen. Denbora horretan, bi Michelin izar mantendu zituen Nomak, eta «Munduko Jatetxerik Onena» izendatu zuten hiru urtez jarraian.