72 Donostia Zinemaldia - 2024ko irailak 20/28
72SSIFF - 2024ko irailak 20/28
Babesle
Ofizialak
Ofizialak
Media
Partner
Partner
"Z365" edo "Zinemaldia urte osoan" Zinemaldiaren apustu estrategiko berria da, non talentu berrien bilaketa, laguntza eta garapena (Ikusmira Berriak, Nest); formakuntza eta zinema-ezagutzen transmisioa (Elias Querejeta Zine Eskola, Zinemaldia + Plus, Zinemagileen elkarrizketa); eta ikerketa, dibulgazioa eta pentsamendu zinematografikoa (Z70 proiektua, Pentsamendua eta eztabaida, Ikerketa eta argitalpenak) elkartzen diren.
Deialdia Sartu NIRE ZINEMALDIRA
Bete formularioa zure datuekin, erregistratutako erabiltzaileentzako edukiak ikusteko.
Sartu zure emaila eta sakatu bidali. Esteka bat jasoko duzu, zure pasahitza berrezarri ahal izateko
Bete formularioa zure datuekin, erregistratutako erabiltzaileentzako edukiak ikusteko.
Agenda
...
Programa eta sarrerak Programazioan bilatu
Bilatu 
Joseph Losey
Filmak
Filmak
Atzera begirako klasikoa
Atzera begirako klasikoa
Joseph Losey
AEB
1939
16 min.
Film laburra
Estatu Batuetako administrazio publikoarentzat eta Rockefeller Fundazioarentzat hainbat film labur egin ondoren, Loseyk animazioko film labur honekin egin zuen fikzioaren eremuan debuta, txotxongiloak erabiliz, petrolioaren erabilera eta garrantzia azaltzeko. New Yorken aurkeztu zen, 1939ko Erakusketa Nagusian.
Joseph Losey
AEB
1941
20 min.
Film laburra
National Youth Administration-erako egindako 20 minutuko film laburra, Rockefeller Fundazioaren babespean. Estatu Batuetako administrazioak etorkizun handiko eta jatorri apaleko gazteak laneratzeko zuzentzen zuen programa dokumentatzen du.
Joseph Losey
AEB
1942
18 min.
Film laburra
National Association of Nursery Educators elkarteak ekoitzitako 18 minutuko film laburra. Haur-hezkuntzaren abangoardian dagoen haur-udaleku bateko eguneroko bizitza kontatzen du. Geroago sorgin-ehizak zigortutako Lloyd Gough aktorea izan zen narratzailea.
Joseph Losey
AEB
1945
19 min.
Film laburra
Polizia-akademiako irakasle batek mafiosoekin adiskidetzen hasitako agente baten historia kontatuko die kadeteei. Loseyk polizia-dramara egindako lehen hurbilketa, Metro Goldwyn Mayer etxeak 30eko eta 40ko hamarkadetan ekoitzitako Crime Does Not Pay film laburren sailaren barruan.
Joseph Losey
AEB
1948
77 min.
Joseph Loseyren lehenengo film luzea auzi sozial eta politiko interesgarriak planteatzen dituen fantasiazko kontakizun bat izan zen. Peter Fryk, gurasoak gerran galdu zituen mutiko batek, bizitza arrunta darama AEBko herri lasai batean. Baina, egun batean, sinetsi ezineko zerbait gertatuko zaio: ileak berdetuko zaizkio. Gai izango al dira haren inguruko guztiak haren ezberdintasuna onartzeko? Sorgin-ehizaren garaiko parabola honen mezuak bere balio osoa gordetzen du gaur egun ere.
Joseph Losey
AEB
1950
82 min.
Loseyk bere garaiari aurrea hartu zion drama honetan: noir estiloaren bitartez, Estatu Batuetan latinoamerikar jatorriko etorkinen aurka dagoen arrazismo ezkutua salatu zuen. Kazetari batek atzean utziko du metropolia, Estatu Batuetako herrixka batean bizitza lasaiagoa eramateko, baina laster zurrunbilo baten erdigunean aurkituko du bere burua, Mexikoko fruta-biltzaile baten kausa defendatzen duenean.
Joseph Losey
AEB
1951
92 min.
Loseyk lehenbiziko sartu-irtena egin zuen zinema beltzean Dalton Trumbo gidoilari mitikoak idatzitako film honekin. Generoko kanonek agindu bezala, maitasun obsesiboa eta krimena dira istorio ilun honen gaiak: Webb Garwood polizia-agenteak harreman ezkutua hasiko du bere etxeko inguruetan norbait dabilela salatu duen emakume ezkondu batekin. Orain, traba egiten dion senarraz libratzea besterik ez du falta Webbek, eta krimen perfektua egiteko plan maltzur bat bururatuko zaio horretarako.
Joseph Losey
AEB
1951
88 min.
Fritz Lang zuzendariak bere maisulana (M, 1931) zuzendu eta hogei urtera, kontakizun lazgarri horren remakea egiteari ekin zion Loseyk. Hein batean benetako gertakarietan oinarritua, haurren hiltzaile baten jazarpena da istorioaren ardatza. Hans Beckert serieko hiltzaile alemaniarra Martin Harrow estatubatuarra bihurtu, eta Berlinetik Los Angelesera eraman zen akzioa; Loseyk ongi daki nola azaleratu hiri horren alderdi zitalena. Zuzendari honen obra ahaztuenetakoa da, eta merezi du berrikustea.
Joseph Losey
AEB
1951
75 min.
Georgie, helduaroaren antsietate guztiei aurre egin behar dien mutiko bat, kirol-kazetari batek haren aitari emandako jipoiaren lekuko izango da. Mendeku bila, hiriko gau-bizitzan zeharreko ibilbideari ekingo dio, eta horrek familiako sekretu lazgarriak ezagutaraziko dizkio azkenean. John Drew Barrymore, ospe laburreko izar gaztea, izan zen zinema beltzaren zantzuak dituen iniziazio-kontakizun honen protagonista.
Andrea Forzano [Joseph Losey]
Italia
1952
82 min.
Loseyk Andrea Forzano izenordea erabili zuen Paul Muni gangster-zinemaren izar zaharra protagonista duen drama hau filmatzeko. Aukera honetan, arlote baten papera jokatu zuen Munik; gizon bat nahi gabe erailtzeagatik poliziarengandik ihesi dabilela, ezinbestean lapurretara jo behar izan duen nerabe bat gurutzatuko zaio bidean. Loseyk bien arteko harremana baliatu zuen, kontakizuna eraiki, eta bere obran hainbatetan agertzen den gai bat jorratzeko: hain zuzen, jazarritakoena.
Victor Hanbury [Joseph Losey]
Erresuma Batua
1954
89 min.
Estatu Batuetatik erbesteratu ondoren, Loseyk Dirk Bogarde antzezlearen alboan egin zuen Britainia Handiko zineman debuta. Gerora, bere aktore fetitxeetako bat bihurtuko zen. Bogardek gaizkile bat jokatu zuen: psikoanalista bikain bati lapurtzen saiatu ondoren, hark esperimentu bateko akuri bihurtuko du; izan ere, krimenerako joera sendatu nahi dio. Loseyk Victor Hanbury izenordea erabili zuen Britainia Handian egindako lehen lan honetan, eta handik urte gutxira ospe handia ekarri zioten giza harremanen giro tirabiratsuak entseatu zituen hemen.
Joseph Walton [Joseph Losey]
Erresuma Batua
1956
95 min.
Joseph Walton izenordea erabiliz, bere drama paranoiko eta ilunetako bat filmatu zuen Loseyk. Oraingoan Reggie Wilson da protagonista: Londresen bizitza berria hasten saiatuko den film-muntatzaile estatubatuar bat, berak ere ezagutzen ez duen iragan ilunetik ihes egin ezin duena. Egun batean, emakume baten eskutitz misteriotsuak jasotzen hasiko da: iraganean bere maitalea izan zela baieztatzen du, baina Wilson ez da hura gogoratzeko gai.
Leslie Norman, Joseph Losey
Erresuma Batua
1956
81 min.
Europako zinemaren egile ospetsuenetakoa bihurtu aurretik, Loseyk zenbait lan filmatu behar izan zituen elikatzeko, kredituetan agertu gabe ere. Horixe gertatu zen zinta xume honetan, non filmaketaren egun batzuetan soilik aritu baitzen. Izu eta zientzia fikzioko zineman espezializatutako Hammer estudioek ekoitzia, mundua suntsitzeko gai den izaki erradioaktibo misteriotsu bati buruzko fantasia katastrofista bat da.
Joseph Losey
Erresuma Batua
1956
29 min.
Film laburra
Delitugile batek, gaizkidearekin izandako liskar batean zauritu ondoren, babeslekua aurkituko du alkoholizatutako sendagile itsu baten etxean. Sendagileak, aldiz, kriminalari itsu dagoela ezkutatzea lortuko du. Loseyk Hammer Films ekoiztetxerako egindako film laburra, ekoiztetxearen ohiko gidoilariak, Jimmy Sangster-ek, idatzia.
Joseph Losey
Erresuma Batua
1957
85 min.
Alec Grahami, hilketa bat egitea leporatu, eta heriotza-zigorra ezarriko diote, berak egin ez duela esan arren. Haren aitak soilik, semeaz inoiz arduratu ez den David alkoholikoak, atera dezake Alec heriotzaren itxarongelatik. Baina, horretarako, 24 ordutan aurkitu beharko du benetako hiltzailea. Britainiar antzeztalde ezin txukunagoak protagonizatzen du polizia-melodrama hau, eta bikaina izan zen Freddie Francis argazki-zuzendariaren lana ere.
Joseph Losey
Erresuma Batua
1958
107 min.
Joseph Loseyren filmografian, film ezohiko eta atipikoenetakoa da garaiko melodrama hau. Kontakizunaren gaia: ingeles aristokrata baten eta haren aberastasuna eskuratzeko berarekin ezkondu nahi duen ijito baten arteko harreman tirabiratsua. Garai hartako Britainia Handiko zineman, erabat berritzailea izan zen Melina Mercourik, Greziako zinemaren izar handiak, hezurmamitutako emakumezko pertsonaiaren karga subertsibo handia.
Joseph Losey
Erresuma Batua
1959
95 min.
Film honetan, Loseyk lehenbizikoz lan egin zuen bere beste aktore gogokoenetako batekin, Stanley Baker-ekin. Intriga kriminala da giza psikologiaren bazter ilunenak agerira ekartzeko aitzakia. Polizia-inspektore batek ezkondutako emakume baten hilketa ikertuko du. Susmagarri nagusia margolari gazte bat da, hildako emakumearen maitale ezkutua.
Joseph Losey
Erresuma Batua
1959
12 min.
Film laburra
Losey publizitatearen alorrean aritu zen kasu bakarra da. Spot hau filmatu zuen Ford Motor Company-ren britaniar adarrerako eta Ford Anglia modeloaren iragarki bat da. 16mm-tan eta Technicolorrean filmatua, oso ludiko eta alaia, ibilgailuaren barnealdea eta edukiera erakusten ditu.
Joseph Losey
Erresuma Batua
1960
97 min.
Loseyren eta Stanley Baker aktorearen arteko bigarren elkarlana. Galestarrak Johnny Bannion hezurmamitu zuen, azken lapurreta egin eta harrapakin guztia ezkutatuko duen lapur bat. Baina, atxilotzen eta espetxeratzen dutenean, gehiegi izango dira dirua non dagoen jakin nahi dutenak. Dudarik gabe, Britainia Handiko zinema beltzaren maisulanetako bat da.
Joseph Losey
Erresuma Batua
1962
87 min.
Loseyren eta Hammer Films fantasiazko zinema-ekoiztetxearen arteko bigarren elkarlanaren emaitza gaur egun kultu-film bihurtu den obra hau izan zen. Gazte-dramaren eta zientzia fikzioko fantasiaren arteko nahaste bitxi honek, Anthony Burgess idazlearen A Clockwork Orange eleberriari urte gutxi batzuetako aurrea hartu, eta gizarte garaikidearen indarkeriari buruzko gogoeta plazaratu zuen, baita, aldi berean, Gerra Hotzeko arma-lasterketaren arriskuei buruzko alegatu ezkorra ere.
Joseph Losey
Frantzia - Italia
1962
125 min.
James Hadley Chase-ren eleberri batean oinarrituta, Loseyk inoiz pantailaratu zuen amodio-istorio nahasienetako baten jokaleku bihurtu zen Venezia. Stanley Bakerrek idazle arrakastatsu bat hezurmamitu zuen; eroso eta luxuz bizi da, harik eta Evek, hura galbidera eramateko prest dagoen femme fatale batek, bizitza suntsitzen dion arte. Jeanne Moreau frantziar izarrak lehen aldiz lan egin zuen zuzendariarekin film honetan, kutsu mitologikoak hartzen dituen emakumezko pertsonaia bat hezurmamituz.
Joseph Losey
Erresuma Batua
1963
116 min.
Loseyren maisulanetako bat da hau, baita, Veneziako zinema-jaialdian estreinatua izan ondoren, nazioarteko aitorpena ekarri zion filma ere. Harold Pinter dramagilearen gidoiarekin eta Dirk Bogarde eta James Fox antzezleen lan bikainarekin, etxezain berri bat kontratatzen duen aristokrata bati buruzko drama klaustrofobiko honek tentsio- eta beldur-zulo bihurtzen du eguneroko espazioa; aldi berean, gizarte-mailen arteko desberdintasunei eta botere-harremanei buruzko gogoeta trebea planteatzen du.
Joseph Losey
Erresuma Batua
1964
88 min.
I. Mundu Gerran, desertatu izana leporatuko diote britainiar soldatu bati, eta fusilamendu-pelotoi batera eraman dezakeen gerra-kontseilu bati aurre egin beharko dio. Prozesuan zehar, Hargreaves kapitainak, haren abokatu defendatzaile izateko izendatutako ofizialak, agerira ekarriko du eta auzitan jarriko du gizakiak gupidarik gabe sakrifikatzen dituen estamentu militar gizagabetua. Gerraren aurkako alegatu irmoa, All Quiet on the Western Front eta Paths of Glory film klasikoen parekoa.
Joseph Losey
Erresuma Batua
1966
119 min.
Modesty Blaise agente sekretua, Peter O’Donnell britainiar idazleak 1963an sortua, James Bonden emakumezko bertsioa eta 60ko hamarkadako pop kulturaren ikono bat izan zen. Loseyk, pertsonaia hori ikuspegi parodiko eta lotsagabez birformulatu, eta Michelangelo Antonioni zuzendariaren aktore kutunenaren, Monica Vitti-ren, aurpegi eta gorputzean hezurmamitu zuen. Antzeztaldean, Vittirekin batera ageri dira Dirk Bogarde, ezinbestean, opereta-gaizkile gisa, eta garai hartako Britainia Handiko zinema-izar gazteetako bat, Terence Stamp.
Joseph Losey
Erresuma Batua
1967
105 min.
Losey eta bere adiskide zaharrak, berriz ere elkarrekin; oraingoan, bere lan adierazgarrienetako batean, zuzendariak Harold Pinter, Dirk Bogarde eta Stanley Baker izan zituen bidelagun. Filmak Epaimahaiaren Sari Berezia irabazi zuen Canneseko zinema-jaialdian. Britainia Handiko unibertsitate bateko giroa, itxuraz baketsua, erabat asaldatzaile bihurtuko da Loseyren lupa-kameraren azpian: boterea lortzeko borrokak, ezkutuko harremanak, desira erreprimituak eta aspertasun existentziala.
Joseph Losey
Erresuma Batua
1968
110 min.
Loseyren lanik zoroenetakoa; ustekabeko elkargune bat, bere estilo lotsakorraren eta bere lankideen gehiegikeria eta nartzisismoaren artean: Tennesse Williams dramagilea; une hartako aktore bikote ospetsuena, Elizabeth Taylor eta Richard Burton senar-emazteak; eta Noël Coward aktore eta idazle ironikoa. Emaitza deliriozko estetika duen pieza bitxi hau izan zen; amodio- eta herio-poema triste bat, Mediterraneoko eguzki engainagarri eta kupidagabearen pean.
Joseph Losey
Erresuma Batua
1968
109 min.
Loseyk berriz ere zuzendu zuen Elizabeth Taylor ganbera-pieza honetan; beste behin ere, buruz buru jarri zituen hiru pertsonaia, erreprimitu duten guztiari aurre egin eta argitara atera dezaten. Leonor-ek Cenci gazte misteriotsua ezagutuko du, eta duela hainbat urte hildako bere alaba ekarriko dio gogora; bestalde, Leonor gaztetan galdu zuen ama dela irudituko zaio Cenciri. Horra hor Mia Farrow eta Robert Mitchum protagonista dituen drama psikologiko intentsu honen abiaburua.
Joseph Losey
Erresuma Batua
1970
110 min.
Loseyren zinemagintzan errepikaria izan zen jazarpenaren gaia, eta film honetan abstrakzio-maila gorena hartu zuen. Bi gizon ihesean doaz, paisaia babesgabea eta arriskuz betea zeharkatuz. Helikoptero batek etenik gabe jarraitzen die, bere harrapakinari uko egingo ez dion animalia nekagaitz eta aspergaitz bat bezala. Ez dago argi nork harrapatu nahi dituen, ezta zergatik ere. Metafora existentzial liluragarri bat, gaur egungo zinemaren aitzindari. Robert Shaw (Jaws baino lehen) eta Malcolm McDowell (A Clockwork Orange baino lehen) izan ziren protagonistak.
Joseph Losey
Erresuma Batua
1971
116 min.
Loseyk Canneseko zinema-jaialdiko Urrezko Palmorria irabazi zuen L.P. Hartley-ren eleberriaren eszenaratze dotore honi esker. Harold Pinter dramagileak egokitu zuen zinemarako, eta Julie Christie eta Alan Bates, Britainia Handiko zinemaren bi aktore ospetsuenetakoak, izan ziren ezkutuko amodioari buruzko kontakizun eder honen protagonistak. Garaia berreraikitzeko saioak ez zuen galarazi zuzendariaren begirada zorrotz eta betiere garaikidea. Michel Legrand-en musikak eta Gerry Fisher-en argazkilaritzak ederki osatu zuten filma.
Joseph Losey
Italia - Frantzia - Erresuma Batua
1972
103 min.
Europako une hartako izar handienetako hiru (Richard Burton, Alain Delon eta Romy Schneider) bildu zituen antzeztaldea izan zen Loseyren armarik onena, XX. mendeko historiako gertakari zirraragarri eta garrantzitsuenetako bat berreraikitzeko: hain zuzen, Ramón Mercador katalanak Trotsky Mexikon hil zuenekoa.
Joseph Losey
Erresuma Batua - Frantzia
1973
106 min.
Europako XIX. mendeko antzezlan garrantzitsuenetako baten egokitzapen zinematografikoa; hau da, Ibsen-en Andere etxea. Loseyk Jane Fonda, Hollywoodeko izarra, aukeratu zuen emakumearen eskubideen aldarrikapenean aitzindari izandako testu klasiko hori protagonizatzeko, eta hark ezin hobe hezurmamitu zuen bere indarra aurkitu eta inguruko giro itogarriari nagusitzen zaion emazte leialaren rola.
Joseph Losey
Erresuma Batua - AEB
1975
145 min.
Loseyk Galileo Galilei pertsonaia historikoa baliatu zuen, beste behin ere desberdina denarekiko intransigentziaz eta boterearen mekanismo zapaltzaileez hausnartzeko. Bertolt Brecht dramagilearen testu baten egokitzapen honetan, paper nagusian antzezpen bikaina egin zuen Topol (Fiddler on the Roof) aktore eta abeslariak.
Joseph Losey
Erresuma Batua - Frantzia
1975
116 min.
Loseyri beti liluragarriak iruditu zitzaizkion identitatea eraikitzeko eta besteekin harremanetan jartzeko erabiltzen ditugun mozorro eta fikzioak; Tom Stoppard dramagileak idatzitako film honetan, koska bat gehiago estutu zuen gaia. Blokeatuta dagoen idazle bat gidoi bat aurrera ateratzeko ahaleginetan da; bien bitartean, emazteak amodiozko harreman bat hasiko du poeta dela dioen alemaniar gazte batekin. Horrela hasiko da haien arteko borroka isila, Loseyren filmen tradizio petoenean.
Joseph Losey
Frantzia - Italia
1976
123 min.
Losey betiere erakarri zuten paranoia-giro eta -egoerek; beraz, non aurkituko zuen naziek II. Mundu Gerran okupatutako Frantzia baino jokaleku hoberik? Mundu horretan mugitzen da Robert Klein arte-merkatari aberats eta dotorea, bere buruaz ez beste inorrez kezkatu gabe. Baina Kafka kutsuak hartzen dituen amesgaizto estugarri honetan, badago beste Robert Klein bat agertzeko lekurik. Eta judua da jatorriz.
Joseph Losey
Frantzia - Espainia
1978
100 min.
Espainian, demokraziarako trantsizio betean, Jorge Semprún espainiarraren gidoia duen pelikula hau filmatu zuen Loseyk. Erbesteratutako antifrankistek diktadorearen heriotzaren ostean bizitako ziurgabetasuna eta nahasmendua dira filmaren ardatza. Faxismoaren legatuak utzitako zauri ahaztezinen inguruko gogoeta bat, Frantziako zinemagintzaren aktore bikainenetako batek protagonizatua: Yves Montand-ek. Alain Resnais-en La guerre est finie filmaren luzapena.
Joseph Losey
Frantzia - Italia - AED
1979
176 min.
Mozarten opera klasikoak ez zuen inoiz izan halako egokitzapen zinematografiko bikain eta luxuzkorik. Italian filmatua, kokaleku erabat ikusgarrietan, lan honetan bat egin zuten Loseyren eta Gerry Fisher kameralariaren talentu bisualak eta austriar konpositorearen jenioak. Paregabeko antzeztaldeak are gehiago liraindu zuen azken horren obra: Ruggero Raimondi, Edda Moser, Kiri Te Kanawa, José Van Dam, Kenneth Riegel eta Teresa Berganza, Lorin Maazel zuzendariaren batutapean.
Joseph Losey
Frantzia
1982
103 min.
Isabelle Huppert eta Jeanne Moreau dira Loseyren filmografiako lan ezezagunenetako honen protagonistak. Zuzendariaren beste film kosmopolita bat, kasu honetan Frantzian eta Japonian filmatua. Filmaren ardatza Frederique-k, amuarrain-haztegi baten jabeak, aurre egin beharreko dilema morala da: edo gaixo dagoen senarrarekiko leialtasuna, edo beste bi gizonekin dituen harremanak.
Joseph Losey
Erresuma Batua
1985
95 min.
Loseyren agur zinematografikoa, zuzendaria 1984an hil eta gero estreinatua, Britainia Handiko zinemagintzaren tradizio osoari egindako omenaldi bat izan zen, halaber, filmaren hiru protagonistei esker: izan ere, britainiar aktore prestigiotsuenetako bi, Vanessa Redgrave eta Sarah Miles, 50eko hamarkadako mito erotikoarekin, Diana Dors-ekin, elkartu ziren haren azken zinema-lanean. Bainu turko batzuetara joan ohi diren hiru emakumek kanpaina bati ekingo diote bainuak ixtea galarazteko.
Babesle Ofizialak:
Media Partner: 
Laguntzaile Ofizialak: 
Instituzio Kideak:
© Donostia Zinemaldia
|
Jendaurreko ordutegia.
Astelehenetik ostiralera: 09:00 - 14:00 | 16:00 - 19:00.
Astelehenetik ostiralera: 09:00 - 14:00 | 16:00 - 19:00.
Harpidetu zaitez buletinak jasotzeko
Formulario hau betez ematen dizkiguzun datu pertsonalak Donostia Zinemaldiak –webgune honen arduradun gisa– tratatuko dituela jakinarazten dizugu. Eskatzen dizkizugun datu pertsonalak jasotzearen eta tratatzearen helburua gure albiste-buletina bidaltzea da. Interesdunaren baimenaren bidez legitimatzen da. Donostia Zinemaldiak bakarrik bidaliko dizkizu mezuak eta zure datuak ez dizkiegu hirugarrenei emango. Ematen dizkiguzun datuak EBn dauden Mailrelayren (marketinerako posta elektronikoko hornitzailea) zerbitzarietan kokatuta egongo direla jakinarazten dizugu. Ikusi Mailrelayren pribatutasun-politika. Formularioan nahitaezko gisa agertzen diren datuak jartzen ez badituzu, baliteke zure eskaerari erantzun ahal ez izatea. Datuak eskuratu, zuzendu, mugatu eta ezabatzeko eskubideak gauzatzeko, hona jo dezakezu: privacidad@sansebastianfestival.com. Datuen babesari buruzko informazio gehigarria eta xehatua gure pribatutasun-politikan kontsulta dezakezu.