Tout là-haut filma snowboardaren eta goi-mendiko eskiaren mundua goresten duten fikziozko lan bakanetakoa da. Serge Hazanavicius freeride estiloaren zale da, eta bere lehen film luzea aurkeztuko du. Istorioaren oinarria Marco Siffredi da, 2002an bere taularekin Everesta jaistean hil zen snowboarderra. Zinemaldian, zuzendariak filmeko zenbait protagonista izango ditu lagun: besteak beste, Bérénice Bejo (Oscarretara izendatua The Artist-engatik eta emakumezko aktore onenaren saria Cannesen Le passé / El pasado filmarengatik), Kev Adams eta Vincent Elbaz. Julie Gayet ekoizlea ere bertan izango da.
Mountain filmaren zuzendaria, Jennifer Peedom, muturreko egoeretan dauden pertsonen gertuko erretratuak egiteagatik ezaguna (Solo [2008], Sherpa [2015]), Donostiara etorriko da irudi ederrez jositako ibilbide erakargarri hori aurkeztera. Irudi zahar nahiz garaikideen bitartez, mendiek mendebaldeko kulturarengan sortzen duten lilura aztertu nahi du.
Paradigm Lost filmak Kai Lenny kirolariaren bilakaera du ardatz. Hawaiiar atleta errespetatuak olatu handietako surf-txapelketa irabazi berri du Puerto Escondidon (Mexiko). Lenny John DeCesare zuzendariarekin etorriko da hirira filma aurkezteko. Lan horretan, surf, kitesurf, windsurf eta foilsurf saioak partekatzen ditu Lennyk diziplina horietan aipagarriak diren hainbat izenekin: John John Florence, Kelly Slater, Robby Naish, Laird Hamilton y Dave Kalamar-ekin, beste askoren artean. Asteazkenean, irailak 27, arratsaldean, 24 urteko surflariak publikoari irekitako aurkezpen bat egingo du Donostiako Hurley Surf Club eskolan (edukiera mugatua, aldez aurretik izena ematea beharrezkoa da).
Bill Heick, 80ko hamarkadaren hasieran olatu bila Indonesiako kostaldea nabigatu zuten abenturazaleetako bat, Donostiara bertaratuko da Secrets of Desert Point filmaren Europako estreinaldian egoteko, Zinemaldiaren esparruan egingo baita. Haren aita dokumental etnografikoen zuzendaria zen, eta Indonesiako eskualdeko dantzei buruzko grabazio sorta bat egitea agindu zion. Berak aukera hori baliatu zuen, gainera, lagunarteko bidaia handi hori ere filmatzeko. Bidaia horrek, hain zuzen ere, surf garaikidearen historian funtsezkoa izan den aurkikuntza bat ekarri zuen.
Savage Cinemako filmetarako sarrerak irailaren 17tik aurrera egongo dira eskuragai, Zinemaldiaren webgunearen bitartez.
Hona hemen aurtengo Savage Cineman izango diren zuzendari eta atletak
Serge Hazanavicius, Tout là-haut filmaren zuzendaria
Serge Hazanavicius aktore gisa hasi zen lanbidean, eta 1986tik hogei bat antzerkilan eta hirurogeita hamar film antzeztu ditu, hala Frantzian nola atzerrian. 2000ko hamarkadaren hasieran bere proiektuak idatzi eta zuzentzeari ekin zion, film labur batekin hasita; ondoren, antzezlanekin eta bakarrizketa komikoekin jarraitu zuen. 2003an 84, Charing Cross Road eleberriaren antzerkirako egokitzapena zuzendu eta antzeztu zuen, eta arrakasta handia bildu zuen bai ikusleen eta bai kritikaren artean. Tout là-haut bere lehen film luzea da eta goi-mendiko eskiarekiko duen zaletasuna islatzen du.
Bérénice Bejo, Tout là-haut filmaren protagonista
Bérénice Bejok 90eko hamarkadan ekin zion bere ibilbideari, Frantziako telebistan eta zineman hainbat rol antzeztuz. Estatu Batuetako zineman 2001ean egin zuen debuta, A Knight’s Tale (Zaldun baten gorabeherak) filmean. Nazioarteko ospea Peppy Miller-en rolak ekarri zion, The Artist filmean. Kritikaren txaloak lortzeaz gain, emakumezko aktore onenaren saria eraman zuen Frantziako zinemaren Cesar sarietan, baita antzeztaldeko emakumezko aktore onenaren Oscarrerako izendapena eta kategoria bereko Urrezko Globoa ere. 2013an, emakumezko aktore onenaren saria eskuratu zuen Canneseko zinema-jaialdian Le passé filmeko rol protagonistari esker.
Kev Adams, Tout là-haut filmaren protagonista
Komediante gisa 2009an hasi zen lanean, Frantziako telebistan aurkezpenak eta antzezpenak eginez. Haiei esker, 2014an Soda telesaila protagonizatu zuen. Fiston eta Kidon komedietako antzeztaldean aritu zen, eta ondoren bere ibilbide zinematografikoa garatu zuen Les profs eta Les nouvelles aventures d'Aladin film arrakastatsuetan parte hartuz. 2016an Vincent Elbaz-ekin batera antzeztu zuen Edouard Pluvieux-en Amis publics filmean.
Jennifer Peedom, Mountain zuzendaria
Jennifer Peedom muturreko egoeretan dauden pertsonei egiten dizkien erretratu zirraragarri eta intimoengatik da ezaguna. Haren filmografiak film hauek hartzen ditu barnean: Sherpa (2015), dokumental onenaren BAFTA sarirako izendatua, beste sari batzuen artean; Miracle on Everest (2008), Living the End (2011) eta Solo (2008). Azken lan horrek dokumentalen zinema-jaialdi garrantzitsuenen sail ofizialetan parte hartu du; besteak beste, Sheffield eta Amsterdamekoetan, eta Australiako Zinema Institutuak dokumental onenaren saria eman zion. Horrez gain, Life at 7 (2012), Life at 9 (2014) eta Miracle in the Desert (2010) ere zuzendu ditu.
Kai Lenny, surflaria eta Paradigm Lost zuzendarikide
Kai munduko waterman osoenetakoa da, eta ur-kirol ia guztiak egiten ditu: kitesurf, windsurf, stand-up-paddle nahiz olatu handietako surfa, besteak beste. Munduko txapeldun titulu ugariren irabazle, Mauiko (Hawaii) iparraldeko kostaldean hazi eta 5 urterekin hasi zen surfean. Kirolari garrantzitsuak izan ditu mentore, besteak beste, Robby Naish, Laird Hamilton eta Dave Kelama, baina gazte xumea izaten jarraitzen du. Duela gutxi Puerto Escondido-n (Mexico) ospatu zen olatu handien txapelketa irabazi zuen.
John DeCesare, Paradigm Lost zuzendarikide
John DeCesare ia-ia bi hamarkadaz egon da akzio-kiroleko filmen abangoardian. Super 8ko kamera batekin, gillotina batekin eta zelo apur batekin hasi zen guztia. Teknologia zaharkituaren errautsetatik birsortutako fenix bat bezala, ekipamendu osoa zuen zuzendari digitala bihurtu zen John. Pixel guzti-guztiei etekin handiena aterata, denetarik filmatu du, eski, surf nahiz futbol.
Bill Heick, surflaria eta Secrets of Desert Point filmaren protagonista
Billen aita, William Heick, Ipar Amerikako kultura indigenei eta Afrika, Indonesia eta Ekialde Ertaineko lurralde urrunei buruzko argazki eta dokumental etnografikoengatik da ezaguna. Elkarrekin jardun zuten 60 urteetan, bidaiatzeko eta dokumental horietako askotan lan egiteko zortea izan zuen Billek. Zinematografiako eta telebistako errealizazioan izandako esperientzia horretaz gain, bere bizitzan surfa izan du lagun handiena, bai etxean, Kalifornian, eta bai mundu osoan zehar egin dituen konta ezin ahala bidaietan.