Ofizialak
Partner
"Z365" edo "Zinemaldia urte osoan" Zinemaldiaren apustu estrategiko berria da, non talentu berrien bilaketa, laguntza eta garapena (Ikusmira Berriak, Nest); formakuntza eta zinema-ezagutzen transmisioa (Elias Querejeta Zine Eskola, Zinemaldia + Plus, Zinemagileen elkarrizketa); eta ikerketa, dibulgazioa eta pentsamendu zinematografikoa (Z70 proiektua, Pentsamendua eta eztabaida, Ikerketa eta argitalpenak) elkartzen diren.
Deialdia Sartu NIRE ZINEMALDIRA 
Agenda Programa eta sarrerak 
Bilatu 
Iberoamerikako ikus-entzunezkoa sustatzeko AECIDen eta Zinemaldiaren arteko elkarlanaren fruitua da saria
Donostia Zinemaldiaren 71. edizioan programatutako bost film egongo dira Espainiako Lankidetza Saria eskuratzeko lehian. Sari hori Garapenerako Nazioarteko Lankidetzako Espainiako Agentziak (AECID) ematen du, zeina Kanpo Arazoetako, Europar Batasuneko eta Lankidetzako Ministerioaren mende dagoen. 2015etik urtero ematen zaio saria giza garapenerako, pobrezia desagerrarazteko eta giza eskubideak bermatzeko ekarpen handiena egiten duen Iberoamerikako (Espainiako eta Portugalgo filmak ere sartzen dira) filmaren ekoizleari.
Enric-Sol Brines i Gómez AECIDeko Komunikazio zuzendaria epaimahikidea izango da honako pertsonekin batera: Perun bizi eta lan egiten duen Xabier Díaz de Cerio kazetari donostiarra eta Donostiako Udaleko Giza Eskubideen departamentuan teknikari den Ana Garayalde.
Espainiako Lankidetza Saria Sail Ofizialean, New Directors sailean edo Horizontes Latinos sailean parte hartzen duen Iberoamerikako film bati ematen zaio. Sariaren helburua da Iberoamerikako ikus-entzunezko industriarekin batera lan egiteko konpromisoa indartzea, talentu berriak bultzatzeko, zinematografiako proiektuen ekoizpena dinamizatzeko, garapenerako lankidetza-balioak zabaltzeko eta filmen merkaturatzea eta nazioartekotzea indartzeko. Sariaren bederatzigarren edizioan ere, Donostia Zinemaldiaren eta AECIDen arteko lankidetzari esker, saria 10.000 eurokoa izango da.
Espainiako Lankidetza Saria irailaren 30ean jakinaraziko da Kursaalean egingo den amaierako galan.
Espainiako Lankidetzaren IX. Sarirako hautagaiak
Hautagaietako bi, Isabel Hergueraren El sueño de la sultana / Sultana’s Dream (Sultanaren ametsa) (Espainia - Alemania) eta María Alché eta Benjamín Naishtaten Puan (Argentina-Italia-Alemania-Frantzia-Brasil), Sail Ofizialean lehiatuko dira. Javier Maciperen La estrella azul / The Blue Star (Espainia -Argentina) filmak New Directors sailean parte hartuko du, eta gainontzeko biek, berriz, Horizontes Latinos sailean: Tatiana Huezoren El eco / The Echo (Mexiko-Alemania) eta Felipe Gálvezen Los colonos / The Settlers (Txile-Argentina-Erresuma Batua-Taiwan-Frantzia-Danimarka-Suedia).
Sail Ofiziala
1905ean Bengalan idatzitako zientzia-fikziozko ipuin feminista batek inspiratuta, Inések iniziazio-bidaia bati ekingo dio Indian barrena, Ladyland emakumeen lurralde utopikoaren bila.
Marcelok bere bizitza irakaskuntzari eskaini dio Filosofia Fakultatean. Bere mentorea zen Caselli irakaslea ustekabean hiltzen denean, Marcelok uste du hutsik geratu den Katedraren jabegoa oinordetzan hartuko duela. Ez du imajinatzen Rafael Sujarchuk, kide karismatiko eta limurtzailea, Katedra hori bera eskuratzeko itzuliko denik Europako unibertsitateetan duen idulkitik. Marcelok hautagairik onena dela erakusteko egiten dituen ahalegin baldarrek duelu filosofiko dibertigarria eragingo dute, bere bizitza eta herrialdea kaos zurrunbiloan sartzen diren bitartean.
New Directors
90eko hamarkada. Rockero espainiar ospetsu batek Latinoamerika zeharkatuko du, bere bokazioarekiko lotura berreskuratzeko asmoz. Han, gainbeheran dagoen musikari zahar bat ezagutuko du eta topaketa horretatik erabateko porrot komertziala izateko itxura duen bikote kixotesko bat jaioko da.
Horizontes Latinos
El Eco Mexiko iparraldeko urruneko herri bat da, eta hango bizitza gauzarik xumeenek osatzen dute. El Econ haur izatea esperientzia paregabea da lehen egunetik, natura, animaliak eta pertsonak nahasita bizi baitira bertan, baita maitasuna, intimitatea eta bizitzaren zikloak ere. Eta, jakina, hezkuntza ere bai, gazteenentzat behintzat.
Txile, XX. mendearen hasieran. Lurjabe aberats batek hiru zaldiko kontratatuko ditu bere jabetza zabal-zabalaren perimetroa mugatu eta Patagonia handian zehar Ozeano Atlantikorako bide bat irekitzeko. Txileko mestizo gazte batez, mertzenario amerikar batez eta teniente britainiar ausart batez osatutako espedizio hori erasoaldi "zibilizatzaile" bihurtuko da laster.
Bideoak
Astelehenetik ostiralera: 09:00 - 15:30