Donostia Zinemaldiak, Tabakalera Kultura Garaikidearen Nazioarteko Zentroak eta Elías Querejeta Zine Eskolak (EQZE) antolatzen dute egonaldirako eta ikus-entzunezko proiektuak garatzeko Ikusmira Berriak programa, eta, gaurtik aurrera, abian da bederatzigarren deialdia.

Irailaren 1era arteko epea egongo da Euskadiko, Espainiako eta beste herrialde batzuetako zinema-proiektuak, Nest sailean parte hartutakoak eta EQZEko ikasleenak aurkezteko. Izen-ematea online egin behar da eta interesdunek sinopsia, tratamendua, asmo-gutuna eta biofilmografia dituen dosierra aurkeztu behar dute. Azaroan jakinaraziko dira bost kategoriatan hautatu diren lanak.

Zortzi asteko egonaldia bitan banatuko da: sei aste 2023ko martxoan eta apirilean proiektua Donostiako Tabakalera zentroan martxan jartzeko, eta beste bi asteak Zinemaldian bertan, zuzendariek beraien proiektua, ordurako garatu samar izango dutena, zinema-industriako ordezkarien aurrean aurkezteko.

Maiatzetik irailera bitarte, zinemagileek beren proiektuetan lanean jarraituko dute, industriako adituen batzordearen aldetik online tutoretza jasotzen duten bitartean.

Gainera, hautatuko lan bakoitzak 5.000 euroko garapenerako laguntza jasoko du ekainean, zinemagileek egoitzako bi faseen artean lan egiten jarraitu ahal izateko. Azkenik, Irusoin ekoiztetxeak Irusoin Postprodukzio Saria emango dio hautatuko proiektuetako bati. Hain zuzen, saria postprodukzio-lana egitea izango da: soinua, kolorea, grafismoa eta DCP masterra. 

Aurtengo edizioa

Egun, Ikusmira Berriak programako zortzigarren edizioan parte hartzen ari dira Ana Cristina Barragán, Jaume Claret, Meritxell Colell, Irati Gorostidi, João Paulo Miranda eta Maximiliano Schonfeld. Martxoa eta apirila bitartean, sei astez, bere proiektuak garatzen hasi ziren Tabakalerako Artisten Gunean, eta irailean berriz ere itzuliko dira Donostiara, Zinemaldiko 70. edizioan parte hartzeko.

Azken urteotan, hainbat neurri ezarri ditu Ikusmira Berriak-ek proiektua indartzeko. Egoitza kopurua bostetik seira handitzeaz gain, online tutoretza bereziak eta pertsonalizatuak eskainiko zaizkie egoiliarrei Elena López Riera, Jean-Gabriel Périot, José Luis Torres Leiva, Lucile Hadzihalilovic, Fernanda del Nido eta Paolo Moretti profesionalen eskutik. Horrela, Ikusmira Berriak talentu berrien bila jarraitzen du, mundu osoko zinemagileei laguntza emanez. Modu horretan, programak talentu berriak bilatzen jarraitzen du, mundu osoko zinemagileei laguntza emanez.

Programaren hazkundearekin batera, gero eta arrakasta handiagoa izan du programak. 2015. urtean lehen edizioa egin zenetik, Ikusmira Berriak programak 28 ikus-entzunezko proiektu garatzen lagundu du eta horietatik, 16 amaitu dituzte haien egileek. Hamahiru estreinatu dira eta ibilbide luzea egin dute nazioarteko hainbat zinema-jaialditan. Aurten, esate baterako, Elena López Rierak El agua filma aurkeztu du Cannesko
Quinzaine des réalisateurs-en.

Arautegia irakurtzeko eta proiektu bat inskribatzeko, klikatu hemen.
IZENA EMATEKO EPEMUGA: IRAILA 1