Fede Gianni, Alexandra Latishev, Kathy Mitrani, Joana Moya, Jaime Puertas Castillo eta Daniel Soares dira Ikusmira Berriak programaren hamaikagarren edizioko egoiliarrak. Martxoaren 24tik ari dira lanean Tabakalerako Zinea eta Ikus-entzunezko Laborategian, Donostian. Han bertan gauzatzen ari da Ikusmira Berriak ikus-entzunezko proiektuen garapenerako egonaldien programaren hamaikagarren edizioaren lehen fasea, Donostia Zinemaldiak, Tabakalera Kultura Garaikidearen Nazioarteko Zentroak eta Elías Querejeta Zine Eskolak (EQZE) antolatuta.

Laborategi horretan prentsaurrekoa eman dute gaur Maialen Beloki Zinemaldiaren zuzendariordeak, Edurne Ormazabal Tabakalerako zuzendari nagusiak eta Carlos Muguiro EQZEko zuzendari akademikoak. Agerraldian, edizio honetarako hautatutako sei zinemagileak aurkezteaz gain, online tutoretza pertsonalizatua nork emango dien ere jakinarazi da, betiere bakoitzaren beharrak eta eskaerak kontuan hartuta.

Horrela, bada, Fede Gianni italiarraren tutorea Manuel Abramovich zinemagile argentinarra izango da. Gianniren proiektua Il Cascatore / Cowboy Billi da, eta iaz Veneziako Kritikaren Astean hautatua izan zen izen bereko film laburra du oinarri; bestalde, Abramovichek argazki onenaren Epaimahaiaren Saria irabazi zuen Donostian, Ikusmira Berriak programaren barruan landutako Pornomelancolía (2022) filmarekin, Zabaltegi-Tabakalera sailean Soldado (2017) eta Blue Boy (2019) lanak aurkeztu ostean. Laura Citarella zuzendari eta ekoizle argentinarra izango du tutore Alexandra Latishev costarricarrak. Citarellak Trenque Lauquen (2022) aurkeztu zuen Zabaltegi-Tabakaleran, Veneziako Orizzonti sailean estreinatu ondoren, eta oraingoan Sirenas / Mermaids hirugarren film luzearekin lagunduko dio Latishevi; EQZEko ikasle izandakoaren lehen proiektua Medea (2017) izan zen, eta Horizontes Latinos sailean proiektatu zen. Tizza Covi eta Rainer Frimmel zinemagileak Vento Film austriar ekoiztetxearen sortzaile dira, eta Ikusmira Berriak programaren aurreko edizioetan tailerrak eman izan dituzte; aurten, ordea, Jaime Puertas Castillo EQZEko ikasle ohiaren tutore izango dira, eta Retorno al valle / Return to the Valley bigarren film luzearekin lagunduko diote, Rotterdamen Historia de pastores lana estreinatu ostean. Valérie Delpierre ekoizleak hainbat proiektutan parte hartu du, hala nola Estiu 1993 / Summer 1993 (2017), 20.000 especies de abejas / 20,000 species of bees (2023) edo Los destellos / Glimmers (2024), eta Joana Moya hartuko du tutoretzapean; Moya Noka programako egoiliar izan da, Kimuak programaren katalogoan sartutako Todo lo cubre la sal / Salt Covers All film laburra egin zuen eta, orain, La Koreana, un poema ferromagnético de luz y memoria / La Koreana proiektuarekin ari da buru-belarri. Radu Jude zinemagile errumaniarrak film onenaren Urrezko Hartza irabazi zuen Berlinale zinema-jaialdian Babardeală cu bucluc sau porno balamuc / Bad Luck Banging or Loony Porn (Zabaltegi-Tabakalera, 2021) filmarekin, eta Daniel Soares portugaldarraren tutore izango da aurten; Soaresek aipamen berezia lortu zuen Canneseko film laburren lehiaketan Bad for a Moment proiektuarekin eta 900 toneladas / 900 Tons lehen film luzea landuko du egonaldian. Azkenik, Kathy Mitrani sortzailearen tutore Claudia Llosa izango da; Llosak ere irabazi zuen Urrezko Hartza Berlinalen La teta asustada / The Milk of Sorrow (2009) filmarekin, eta Donostiako Sail Ofizialeko lehian aurkeztu zuen Distancia de rescate / Fever Dream (2021) filma. Mitraniri dagokionez, Nest sailean Sombras nada más / Nothing But Shadows (2023) film laburrarekin parte hartu ondoren, orain bere lehen film luzea prestatzen ari da: La danza de las sombras / The Dance of the Shadows.

Lehen egun hauetan, zer baliabide izango dituzten ezagutzeko aukera izan dute egoiliarrek. Era berean, sarbidea doan izango dute Tabakalerako pantaila partekatuko proiekzio guztietan, Euskadiko Filmategiko zinema-aretoan eta Medialab guneko funtsetan.

Idazketako, sorkuntzako eta muntaketako tailerrak, eta lan-saioak

Halaber, lehen astean, Violeta Gil idazle, filologo eta sortzaile eszenikoak emandako idazketa-tailer batean parte hartu dute, eta joan den larunbatean beren film laburren proiekzioa aurkeztu zuten Tabakaleran. Datozen egunetan, Sobre todo de noche / Foremost by Night (2023) film luzea egin duen Victor Iriarte zinemagileak zuzendutako sorkuntza-tailer batean parte hartuko dute, eta egonaldiaren azken astean muntaketa-tailerra izango dute Claire Atherton muntatzailearekin; Chantal Akerman zuzendariaren kolaboratzaile izan da 30 urtez baino gehiagoz Atherton, eta gaur egun artista eta zinemagileekin ari da lanean, besteak beste, Eric Baudelaire edo Wang Bing-ekin.

Aste honetan, egoiliarrek aurrez aurreko bilerak izan dituzte sektoreko profesionalekin: Flor Clérico ekoizle eta aholkulariarekin, Olimpia Pont Cháfer aholkulariarekin eta Javier Martín aholkulari eta Donostia Zinemaldiko Hautespen Batzordeko kidearekin. Eta, maiatzaren hasierara bitarte, euren proiektuak landu eta kontrastatzeko denbora izango dute, baita sareak osatzeko ere, Tabakalerako komunitateko kideekin, EQZEko ikasleekin, Nokako zinemagileekin edo Zinemaldiko, Tabakalerako eta EQZEko lan-taldeekin.

Sei aste horien buruan, Ikusmira Berriak programaren edizio honetarako hautatuak izan direnek beren proiektuetan lanean jarraituko dute, eta aipatutako online tutoretza-saioak jasoko dituzte. Ekainean, egoiliar bakoitzak 5.000 euroko laguntza jasoko du film luzea gauzatzeko eta, irailean, Zinemaldia egiten den bitartean, Donostiara itzuli eta egonaldiaren azken bi asteak beteko dituzte. Fase horretan, beren proiektua industriako profesionalei aurkeztu ahal izango diete, eta hitzorduen agenda pertsonalizatua izango dute proiektuetan parte hartzeko interesa duten pertsonekin.

Nazioartean sendotzea, atzerabegirakoa eta argitalpen monografikoa

Ikusmira Berriak programak sendotze handia bizi du nazioartean duela zenbait urtetik, programako proiektuak aukeratu izan baitituzte zinema-jaialdi ugaritan: Quinzaine des Cinéastas (El agua / The Water, Elena López Riera, 2022; Creatura, Elena Martín, 2023), Sundance (All Dirt Roads Taste of Salt, Raven Jackson) eta Donostia Zinemaldia (O Corno / The Rye Horne, Jaione Camborda, Urrezko Maskorra 2023an). Iaz, Nele Wohlatz-en (Ikusmira Berriak 2018) Dormir de olhos abertos/ Sleep With Their Eyes Open aukeratu zuten Berlinaleko Encounters atalean, eta Fipresci saria eman zioten. Gainera, Zabaltegi-Tabakaleraren epaimahaiak aipamen berezia eman zion Jessica Sarah Rinland-en Monólogo colectivo / Collective Monologue lanari. 2015ean egindako lehen ediziotik, Ikusmira Berriak programak ikus-entzunezko 50 proiektu garatzen lagundu du; proiektu horietako 23 nazioarteko zinema-jaialditan estreinatu eta aurkeztu dira, 16 saritu dira eta gainerakoak garatzeko fasean daude edo estreinatzeko zain, hala nola Diego Céspedes, Irati Gorostidi, Jaume Claret eta Ana Cristina Barragan zinemagileen lanak.

Gainera, Tabakalerak talentu berriaren alde egiten jarraitzen du, baita zinemaren eta arte garaikidearen arteko fusioa bultzatzen ere. Ildo horretan, Ikusmira Berriak programako zinemagileei pantailatik haratago joan eta beren lanak erakusketa-aretora eramateko aukera eskaintzen die zentroak. Horren erakusgarri dira Jessica Sarah Rinland, iaz Extramission: Capturando ojos luminosos erakusketa aurkeztu zuena; Urrezko Maskorraren irabazle Jaione Camborda, gaur egun Visiones cuánticas proiektuan dabilena, eta hurrengo erakustaldia Irati Gorostidi errealizadoreak egingo du, Tabakalerako 2. erakusketa-aretoan, irailaren 11tik aurrera.

Bestalde, Z365 urte osoko Zinemaldia ekimenaren barruan, Zinemaldia + Plus zikloan Ikusmira Berriak 10 urte dago ikusgai urtarriletik, hamar urteetako egonaldi zinematografikoak aztertu eta ospatzen dituen atzerabegirakoa. Zinemaldiak, Tabakalerak eta EQZEk antolatutako zikloan 21 filmek parte hartzen dute, programaren esparruan egindako filmak izanik, eta nazioarteko zinema-jaialdietan estreinatu direnak, besteak beste, Donostian, Cannesen, Venezian, Berlinen, Sundancen eta Locarnon. Hurrengo saioetan, film hauek proiektatuko dira: Chupacabra (Grigory Kolomytsev, 2020), Creatura (Elena Martín Gimeno, 2023), Stephanie (Leonardo Van Dijl, 2020), Jo ta ke (Aitziber Olaskoaga, 2020) eta El agua / The Water (Elena López Riera, 2022).

Azkenik, hamargarren urteurrenaren ospakizunak bukatzeko, Ikusmira Berriak programarekin lotutako ahots, irudi eta hausnarketak bilduko dituen liburu bat argitaratuko da hilabete batzuk barru. Programan parte hartu duten hamar zinemagilerekin egindako elkarrizketak ez ezik, tutore izan direnen edo proiektua bultzatzen duten erakundeetako ordezkarien ekarpenak ere jasoko ditu argitalpenak. Azken batean, egonaldiaren hamar urteen berri emango duen memoria izango da, parte hartu duten 53 zinemagileen parte-hartzearekin.