Donostia Zinemaldian aurkeztu zuten atzo Spanish Screenings On Tour ekimenaren hirugarren edizioa, zeinak AEBko merkatuan jarriko baitu arreta, Espainiako ikus-entzunezkoak nazioarteko merkatuan indartzen jarraitzeko. Ekitaldian parte hartu zuten Ignasi Camós Kultura Ministerioko Zinematografiaren eta Ikus-entzunezko Arteen Espainiako Erakundearen (ICAA) zuzendari nagusiak, Elisa Carbonell Espainiako Esportazio eta Inbertsio Erakundeko (ICEX) kontseilari delegatuak eta Juan Antonio Vigar Málagako zinema-jaialdiko zuzendariak. Guztiek ere «Spanish Screenings XXL. Un mercado internacional para la producción audiovisual española» ekimena ordezkatu zuten, zeina «España Hub Audiovisual de Europa» (Spain AVS Hub) egitasmoan eta Espainiako Gobernuak bultzatutako Suspertze eta Erresilientzia Planean baitago txertatuta.

Aurkezpenean, hitzordu horretan esku hartuko duten jarduerak, proiektuak eta obrak xehatu zituzten, kontuan izanik programa horretan presentzia mardula izango duela Espainiak AEBko ikus-entzunezko merkatu nagusian. Animazioak, zinema fantastikoa, telesailak... Ordezkaritza horrek garapenaren azken faseetan dauden bederatzi proiektu izango ditu, baita salmenta nazionalen eragile nagusien remake-katalogo zabal bat eta merkatuan eginiko film-proiekzioak ere. Gainera, Espainiako hamar enpresa baino gehiago izango dira ekitaldian, eta aukera izango dute beren lanak eta proiektuak aurkezteko nazioarteko ikus-entzunezko industriaren figura nagusien aurrean. 

Kursaaleko Prentsa Klubean egin zen ekitaldian, Ignasi Camósek egin zuen aurkezpena, eta nabarmendu zuen Espainiako ikus-entzunezkoak gero eta presentzia handiagoa duela Venezian Pedro Almodóvarri eman berri zaion Urrezko Lehoiari, Torontoko edo Donostiako zinema-jaialdietan, besteak beste, izaniko presentzia handiari eta koprodukzioak ugaritu izanari esker. Industriaren zeregina eta sektorea nazioartekotzeko premia nabarmendu zituen, eta adierazi zuen beharrezkoa dela koprodukzioan eta nazioarteko inbertsioan arreta jartzea. Era berean, adierazi zuen Zinematografiaren eta Ikus-entzunezko Arteen Espainiako Erakundeak helburu horiexek markatu dituela nagusitzat, eta Spanish Screeningsek bide horretan egindako lana nabarmendu zuen. Aurreko edizioei errepasoa eginez, baieztatu zuen programa industria nazioartekotzeko tresna bilakatu dela, Ventana Sur merkatu iberoamerikarrean eta Erromako MIA merkatu europarrean izandako esperientzia arrakastatsuei esker. «Oraingo honetan, Spanish Screenings On Tourrek beste urrats bat egin nahi du helburu hori lortzeko bidean, Espainiako gure industriak presentzia handiagoa izan dezan AEBko ikus-entzunezko merkatu nagusian», esan zuen zuzendari nagusiak.

Elisa Carbonellek, berriz, merkatuan izango diren proiekzioen xehetasunak aurreratu zituen. Lehen aldiz, aurrez aurre zein online egingo dira Market Screening saioak, eta hamazazpi film izango ditu. Atalaren helburua da gure industriaren proiekzioa hobetzea, eta banaketaren garrantzia nabarmendu zuen, batez ere aretoei dagokienez: «AFMren 2024ko edizioko Market Screenings programak film luzeen nazioarteko banaketa sustatzen du, eta arreta berezia jartzen dio aretoetara bideratutako banaketa-lanari. Hala, merkatu sendo bat ezartzen du emanaldien inguruan. Saio esklusibo horiek aukera estrategikoa eskaintzen diete salmenta-agenteei film berriak erakusteko eta nazioarteko erosle-publiko espezializatuen aurrean aurkezteko».

Juan Antonio Vigarrek Spanish Screenings On Tourren hautatutako proiektuak aurkeztu zituen. Animation Showcase atalak lau animazio-proiektu izango ditu, eta, hala, bereziki azpimarratzen du Espainiako sektoreak nazioarteko animazioaren panoraman duen garrantzia. Adibide gisa jarri zuen Rock Bottom (María Trenor), zeinak On Tour Work-In-Progress ekimenaren azken edizioan parte hartu baitzuen eta Donostia Zinemaldiaren aurtengo edizioan aurkeztuko baitute. Horrekin, Espainiako ikus-entzunezkoen balio-katea nabarmendu zuen.

Fantastic Showcase atalak, berriz, fantasiazko, beldurrezko eta zientzia-fikziozko bost zinema- eta telesail-proiektu ditu, eta Sitges FanLab-eko programazio-taldearen laguntza izan du aurkeztutako proiektuak balioesteko. Aurkezpen-gutun ezin hobea da hori, fantasiazko zinemak presentzia nabarmena duen merkatu baterako. Balio-kate horretan, Espainiako ikus-entzunezkoen goranzko beste motor bat nabarmendu zuen; hau da, egokitzapenak. Spanish Screenings On Tourren aurtengo edizioan, Remakes Showcase atalak ordezkatuko ditu egokitzapenok. Hala, salmenta-agenteek eta ekoizleek katalogo zabal bat izango dute AEBko merkatuan aurkezteko, jakinik egokitzapenak merkatu-kuota handia duela. Spanish Screenings On Tourren helburua ez da «Espainiako ikus-entzunezkoak nazioartekotzea bakarrik, gure talentuaren eta gure mugetatik kanpoko esperientziaren erakusle izatea ere bada», nabarmendu zuen Málagako zinema-jaialdiko zuzendariak.

Urrian, hautatutako proiektuak eta enpresak jakinaraziko dira, eta Espainiako ikus-entzunezkoen aniztasuna eta talentua bistaratuko da. Hala, industria gonbidatuko da Las Vegasen azaroaren 5etik 10era bitartean egingo den American Film Market ekitaldiaren hurrengo ediziora, honako lelo honekin: «Spanish Audiovisual: Creativity, Diversity & Success».

American Film Market ekitaldiari buruz

American Film Market (AFM) zinemagintzaren barnean eskuratzeko, garatzeko eta networkingerako ekitaldi nagusietako bat da mundu zabalean. AFMren barruan, filmak banatzeko eta finantzatzeko akordioak lortzen dira —urtean mila milioi dolar baino gehiagoko balioarekin—, bai amaitutako filmetarako, bai garapen-etapa guztietan daudenetarako. Ikus-entzunezkoen industriako esparru guztietako milaka profesional elkartzen dira urtero AFMn, mundu osoko ikus-entzuleei zuzendutako hamaikatxo film eta proiektu independente garatu, erakutsi, deskubritu, finantzatu eta lizentziatzeko.

Spanish Screenings XXL ekimenari buruz

Spanish Screenings On Tour ekimena «Spanish Screenings XXL. Un mercado internacional para la producción audiovisual española» proiektuaren parte da. Egitasmo horretan esku hartzen dute Kultura Ministerioak, Zinematografiaren eta Ikus-entzunezko Arteen Espainiako Erakundearen (ICAA) bidez, Eraldaketa Digitalerako eta Funtzio Publikorako Ministerioak, Espainiako Esportazio eta Inbertsio Erakundeak (ICEX), Málagako zinema-jaialdiak eta Donostia Zinemaldiak.