Tabakalerak eta Koldo Mitxelena Kulturuneak, Donostia Zinemaldiaren eta Elías Querejeta Zine Eskolaren laguntzarekin, zineaz eta zinetik hitz egiteko urteko programazio bateratua aurkeztu dute. 2023ko azarotik 2024ko ekainera bitartean, bertako eta estatuko hogei zinemagilek baino gehiagok beren sorkuntzak eta beren zinema-proposamenak egiteko garatu dituzten lan-prozesuak hurbilduko dizkiete publiko zabalari.

Jaione Camborda (Donostia Zinemaldiko Urrezko Maskorra irabazi berri duena), Isabel Coixet zinemagilea eta Sara Mesa idazlea, Isabel Herguera, Juan Antonio Bayona zuzendaria eta Belén Atienza ekoizlea, Itsaso Arana edo Fermin Muguruza daude, besteak beste, programazio hori osatuko duten hizlarien zerrenda luzean.

Hitzaldiak eta elkarrizketak

Pantaila publiko partekatua izateaz gain, Tabakalerako zinemak herritarrentzako ikasgela gisa ere funtzionatu du hasiera-hasieratik. 2020an, bere alderdi pedagogikoa zabaltzeko modu gisa, Tabakalerak 'Kontatutako zinea' zikloa jarri zuen abian; zinegileentzako gonbidapena, aretoa bere egin zezaten eta laneko beren barne-prozesuen berri eman zezaten. 2020tik 2023ra, 22 zinemagilek hartu dute parte Tabakaleran 'Kontatutako zinea' saioetan. Datozen hilabeteetan, hamar bat zuzendarik euren filmen xehetasunak kontatuko dituzte Tabakalerako zinema aretoan. Saioak zuzenean jarraitu ahal izango dira, aurrez aurre; eta grabatu ondoren, Tabakalerako webguneko 'Kontatutako zinea' ataleko ikus-entzunezko edukien eskaintzan sartuko dira.

Aldi berean, Koldo Mitxelena Kulturuneak, eztabaidarako, sorkuntzarako eta ezagutzarako guneak sortzen duen ibilbide luzearekin, 'Zinemagileen elkarrizketak' ikastaroa sortu zuen Donostia Zinemaldiko Z365 eremuarekin eta Elías Querejeta Zine Eskolarekin batera. Ikastaro horrek zinema-sorkuntzaren intrahistorian jartzen du arreta, zinemagile baten eta film baten sail desberdinetan (gidoian, ekoizpenean, muntaian, musikan edo aktoreen zuzendaritzan, besteak beste) bere ohiko kolaboratzailearen arteko elkarrizketaren bidez.

Aurten 'Zinemagileen elkarrizketak' Donostiako Alde Zaharreko Santa Teresa komentura lekualdatuko da, Koldo Mitxelena Kulturuneko obrak direla-eta. Ikastaroak alderdi pedagogikoa nabarmenduko du, eta bertaratutakoei matrikula egiteko aukera emango die. Matrikula horrek, programan parte hartzeaz gain, tailerrez, topaketez eta beste prestakuntza-proposamen batzuez osatutako programazio osagarri baterako sarbidea erraztuko du. Matrikula doakoa izango da eta herritar guztientzat zabalik egongo da, ikasleetatik hasi eta zinemazaleetaraino. Aurrez aurrekotasuna eta topaleku izaera bultzatzeko, saioak ez dira streaming bidez emango, baina grabazioak Koldo Mitxelenaren eta Zinemaldiaren webgunean egongo dira ikusgai denboraldiaren amaieran.

Azken batean, bi programen atzean etengabe elkar ukitzen duten ardatz estrategiko handiak daude: ezagutzen transmisiorako eta pedagogia artistikorako, dibulgaziorako eta sorkuntzari laguntza iraunkorra emateko borondatea. Bi ekimen horiek abian jarri zirenetik hiru urte igaro ondoren, deialdi-gaitasun handiarekin, hiriko publiko eta erabiltzaile desberdinak erakarriz, programa bateratu bat planteatu da, modu koordinatuan diseinatua eta ikasturte osoa hartuko duen egutegia izango duena. Bi programen bateratzeak egungo zinearen egoeraren azterketa sakona eskainiko du, eta tokiko eta estatuko esparruan egiten diren urteko ekoizpen zinematografikoen zabalkundea bultzatuko du.

Urteko programazioa

Programa bateratua azaroan hasi eta ekainean amaituko da, eta proposamen zinematografiko ugariren hogei bat protagonistek eta arduradunek hartuko dute parte:

• Azaroak 11 - Matías Piñeiro
• Azaroak 16 - Elena Martín
• Azaroak 25 - Michel Gaztambide
• Abenduak 17 – Fermin Muguruza
• Urtarrila - Jaione Camborda
• Otsaila - Isabel Herguera
• Otsaila - Ion de Sosa
• Martxoa - Celia Rico
• Apirila - Alberto Martín Menacho

1. Taldean zuzentzea: Negu Hurbilak
2. Zinea eta beste diziplina batzuk: Víctor Iriarte eta Carlos Muguiro
3. Opera prima bat egitea: Itsaso Arana, Laura Ferrés eta Javier Macipe
4. Literatura-egokitzapenak: Isabel Coixet eta Sara Mesa
5. Film bat ekoiztuz: JA Bayona eta Belén Atienza
6. Zinea idaztea: Belén Funes eta Marçal Cebrián
7. Animazioa: Isabel Herguera eta Pablo Berger

'Zinemagileen elkarrizketak' saioen datak eta matrikula egiteko prozedura laster jakinaraziko dira.

'Kontatutako zinea'-ren eta 'Zinemagileen elkarrizketak'-en aurreko edizioak

2020tik 2023ra, 22 zinemagilek hartu dute parte Tabakaleran 'Kontatutako zinea' saioetan:

1. Maria Elorza. A los libros y a las mujeres canto.
2. Paul Urkijo. Irati.
3. Marina Lameiro. Young and beautiful eta Dardara.
4. Estibaliz Urresola. 20.000 especies de abejas.
5. Ruth Beckermann.
6. Mia Hansen-Løve.

1. Radu Jude. Un polvo desafortunado.
2. Arantza Santesteban. 918 gau.
3. Chema García Ibarra. Espíritu Sagrado.
4. Helena Girón eta Samuel M. Delgado. Eles transportan a morte.
5. Carlos Casas. Cemetery.
6. Isaki Lacuesta. Un año, una noche.
7. Mikel Gurrea. Suro.

1. Maite Arroitajauregi eta Aranzazu Calleja. Akelarre.
2. Nuria Giménez Lorang. My Mexican Bretzel.
3. Dea Kulumbegashvili. Beginning.
4. Koldo Almandoz eta Marian Fernandez. Hondar ahoak.
5. David Pérez Sañudo. Ane.

1. Jon Garaño, Aitor Arregi, José Mari Goenaga. La trinchera infinita.
2. Oliver Laxe. O que arde.
3. Carlos Marqués-Marcet. Els dies que vindran.
4. Itsaso Arana eta Soleá Morente. La virgen de agosto.

Bestalde, 28 hizlarik hartu dute parte 'Zinemagileen elkarrizketak' delakoaren bi edizioetan:

1. Lara Izagirre eta Paula Olaz
2. Icíar Bollaín eta Koldo Zuazua
3. Carla Simón eta Ana Pfaff
4. Jonás Trueba eta Javier Lafuente
5. Rodrigo Sorogoyen eta Isabel Peña

1. Estibaliz Urresola, Irati Gorostidi eta Maider Fernández Iriarte
2. Albert Serra, Ariadna Ribas eta Artur Tort
3. Fernando Franco, Telmo Irureta eta Valèria Sorolla
4. Pilar Palomero eta Sofía Escudé
5. Alauda Ruiz de Azúa eta Carlota Pereda
6. Alberto Rodríguez eta Rafael Cobos
7. Aitor Arregi, Jon Garaño eta Jose Mari Goenaga