Donostia Zinemaldiaren eta Elías Querejeta Zine Eskolaren José Ángel Herrero-Velarde beken bigarren deialdiak Minerva Camposen, Violeta Kovacsicsen eta Aida Vallejoren ikerketak sustatuko ditu. Honako hauei buruzkoak dira, hurrenez hurren: Donostia Zinemaldiaren eta Film Ekoizleen Elkarteen Nazioarteko Federazioaren (FIAPF) arteko harremana, Donostia Zinemaldiaren eta trantsizioko zinemaren historiografiaren arteko gurutzaketa eta jaialdiaren historia soziokulturala, haren espazioen analisien bidez.

Laguntzen bigarren deialdia espainiar estatuan jaio diren edo bizi diren ikertzaileei zuzenduta dago, eta helburu du Zinemaldiaren artxibo historikoaren ikerketa bultzatzea, testu akademiko argitaragabeak sortzeko, iturri nagusitzat Zinemaldiaren artxibo historikoa erabilita; eta, hala, jaialdiaren iragana aztertzeaz gain, orainarekin eta etorkizunarekin etengabeko elkarrizketan jardutea.

Donostia Zinemaldiko eta Elías Querejeta Zine Eskolako kideek osatutako batzorde batek joan den hilean ebatzi zituen hiru ikerketa-bekak. Batzordeak Minerva Camposen, Violeta Kovacsicsen eta Aida Vallejoren proposamenak aukeratu ditu, "pluralak eta gairen aldetik egokiak direlako, maila teorikoan zinema-jaialdien ikerketan eta Estatuko eta nazioarteko zinematografiaren ezagutzan ekarpena egiten dutelako eta Zinemaldiaren artxiboko baliabideak iturri nagusitzat erabili dituztelako".

Minerva Campos Gaztela-Mantxako Unibertsitateko irakasleak bere ikerketa-proiektuan proposatzen du "aztertzea Donostia Zinemaldiaren eta Film Ekoizleen Elkarteen Nazioarteko Federazioaren arteko harremanak, horren lehen hamarkadetan, jaialdia A kategorian sartzearen eta hortik ateratzearen harira". Camposen hipotesiaren arabera: "Zinemaldiak ezegonkortasuna eta aldaketa etengabeak bizi izan zituen politikaren, nazioarteko diplomaziaren, tokiko ekonomiaren eta arte zinematografikoaren arloetan 1953aren eta 1985aren artean, bilakaera natural bat dela eta. Bilakaera hori haren nortasun partikularra finkatzera eta nazioarteko testuinguru zinematografikoaren barruan rol espezifiko bat jokatzera bideratuta zegoen".

Violeta Kovacsics zinema-kritikari eta Pompeu Fabra Unibertsitateko irakasleak gutxi esploratu den gurutzaketa bat jorratuko du: trantsizioko zinemaren historiografiaren eta Donostia Zinemaldiak garai horretan bizi izan zituen erronken eta zailtasunen artekoa. Ikerketaren helburua da "Donostia Zinemaldiak trantsizioaren garaiko Espainiako zinematografiaren joera estetikoak, narratologikoak eta diskurtsibitate politikokoak definitzen zer rol jokatu zuen aztertzea".

Aida Vallejo ikertzaile eta Euskal Herriko Unibertsitateko irakaslearen ikerketa-proiektuak proposatzen du "Zinemaldiak bere jarduerak egiteko erabiltzen dituen espazioak identifikatzea eta jaialdiaren historia soziokultural bat eraikitzea, esperientzia kolektibo eta elkartzeko eta ideiak trukatzeko toki gisa". Lanak osagai grafiko handia du, eta Zinemaldiaren espazioen kartografia bat ezarri nahi du (bai proiekzioetarako direnak, bai jarduera paraleloak egiteko direnak), zinemagileen eta sektoreko profesionalen ibilbidean ondorioak izan dituzten ezinbesteko topaketak identifikatzeko.

Ikerketa horiez gain, lehen deialdian, Felipe Cabrerizo idazle eta programatzailearen, Endika Rey irakaslearen eta Neus Sabaté EQZEko alumni eta irakaslearen ikerketak aukeratu ziren (uztailean egin zituzten egonaldiak). Honako hauei buruzkoak dira, hurrenez hurren: eremu sozialistako herrialdeetako ekoizpen zinematografikoa, jaialdiaren eta zinemagile hasiberrien film luzeen arteko harremana eta Josefina Molina, Pilar Miró eta Cecilia Bartolomé Donostian berriz elkartzea.

Ikerketa-egonaldia

Ikerketa-egonaldiari esker, hautatutako ikertzaileek 3.500 euroko dirulaguntza jasoko dute, bai eta bidaia eta ostatua ere. Halaber, artxibora sartzeko edukiko dituzten bi asteetan, kontsulta-egunei dagozkien dietak izango dituzte.

Tabakalera eraikineko egonaldi-fasean –bertan daude Zinemaldiaren artxiboa osatzen duten material guztiak–, lanerako eta kontsultarako gune bat izango dute Euskadiko Filmategian. Bestalde, eraikinean eta aldamenekoetan dauden funts eta artxibo zinematografikoetarako sarbidea izango dute, bai eta eraikineko baliabide eta jardueretarako sarbidea ere, hala nola zinema-saioetarako, tailerretarako eta eskola magistraletarako.

Lanak (6.000 eta 10.000 hitz artean izan beharko dituzte) zazpi hilabeteko epean amaitu beharko dira, hautaketa-datatik kontatzen hasita, eta bi hilabeteko luzapena eskatzeko aukera izango da.
Zinemaldia artikuluak argitaratzen ahaleginduko da, eta ikertzaileen eta proiektuak editatzeko eta argitaratzeko interesa izan dezaketen argitaletxe edo aldizkari ospetsuen arteko bitartekari gisa jardungo du. Ikerketa horiek Zinemaldiak, Elías Querejeta Zine Eskolak eta Euskadiko Filmategiak batera argitaratzen duten ZINE: ikerketa zinematografikorako koadernoak aldizkari akademikoaren argitalpen-batzordeak ere kontuan hartu ahal izango ditu.

JOSÉ ÁNGEL HERRERO-VELARDE BEKEN BIGARREN DEIALDIAN HAUTATUTAKO PROIEKTUAK

• Minerva Campos: Donostia Zinemaldiaren "A" jokoan: negoziazioak FIAPFekin eta diplomazia zinematografikoa (1953-1985).

• Aida Vallejo: Topaketak Zinemaldian. Donostia Zinemaldiaren historia soziokultural bat haren espazioen bitartez.

• Violeta Kovacsics: Trantsizioko zinema eta Donostia Zinemaldia.