Ofizialak
Partner
"Z365" edo "Zinemaldia urte osoan" Zinemaldiaren apustu estrategiko berria da, non talentu berrien bilaketa, laguntza eta garapena (Ikusmira Berriak, Nest); formakuntza eta zinema-ezagutzen transmisioa (Elias Querejeta Zine Eskola, Zinemaldia + Plus, Zinemagileen elkarrizketa); eta ikerketa, dibulgazioa eta pentsamendu zinematografikoa (Z70 proiektua, Pentsamendua eta eztabaida, Ikerketa eta argitalpenak) elkartzen diren.
Deialdia Sartu NIRE ZINEMALDIRA 
Agenda Programa eta sarrerak Bilatu 
WIP Europa irailaren 25etik 27ra egingo da Donostia Zinemaldiaren Industriako jardueren esparruan
Alemania, Espainia, Hungaria eta Turkiako bost ekoizpenek osatzen dute WIP Europaren aurtengo hautaketa. Donostia Zinemaldiaren ekimena irailaren 25etik 27ra egingo da. Hein handienez, Europan ekoitzi diren postprodukzio-fasean dauden filmak biltzen ditu.
Michael Fetter Nathansky zuzendari alemaniarrak bere bigarren filma aurkeztuko digu, Mannequins (behin-behineko izena), Europako meatze-eskualde handienetako batean maitemintzearen magiari eta maitasuna galtzearen prozesu mingarriari buruzko drama erromantiko bat. Filmak Mannheim-Heidelbergeko zinema-jaialdiko Cutting Edge Talent Camp ekimenean parte hartu zuen proiektu-fasean zegoela.
Halaber, Sima’s Song Roya Sadat zinemagile afganiarraren bigarren film luzea da; emakumeen eskubideen aldeko aktibismoagatik nabarmendu izan da Sadat. Espainia, Herbehereak eta Frantzia arteko koprodukzio hau Afganistanen girotuta dago Gerra Zibila hasi aurretik. Kontrako iritzi politikoak dituzten bi lagun intimoen arteko liskarra kontatzen digu. Filmak Busango zinema-jaialdiko Asian Project Market merkatuko TAICCA saria irabazi zuen.
Rock Bottom, Espainia eta Polonia arteko koprodukzioa María Trénorren lehen film luzea –ekoizpen espainiarrekoa hau ere– Robert Wyatten bizitzan eta musikan inspiratutako animazioa da. Iaz, Spanish Screenings: Financing & Tech ekimenean aurkeztu zen, baita 2023ko Marché du Film merkatuko Animation Day jaialdiko Annecy Animation Showcase delakoan ere. Egilearen ¿Con qué la lavaré? (2004) film laburra Berlingo zinema-jaialdian hautatua izan zen eta film labur onenaren Teddy Bear saria irabazi zuen.
Bestalde, Mihály Schwechtje zinemagile eta antzerkigile hungariarrak –film laburren zuzendari gisa ibilbide nabaria duenak– bere bigarren film luzea zuzendu du, Sündvadászat / A Hunt for Hedgehogs, noizean behin lehengusu baten seme-alabak zaintzen dituen kantu-ikasle bati buruzkoa. HBO Hungary katearen In Treatment telesail ezagunaren buru izan da. Bere lehen film luzea, Remélem legközelebb sikerül meghalnod:) / I Hope You’ll Die Next Time:) (2018), Tallinn Black Nights jaialdiko gazteen lehiaketako film onenaren sariaren irabazle izan zen eta arrakasta handia izan zuen Hungarian.
Azkenik, Zeynep Köprülü zuzendari turkiarrak bere lehen film luzea aurkeztuko du; hala, Suyun Yüzü / On the Water Surface pelikulako protagonistak jaioterrira bidaiatuko du bere amaren bigarren ezkontza ospatzeko, honek barne-bidaia ere ekarriko du beretzat.
Duela gutxi WIP Europan parte hartu duten zinemagile askok –hala nola Arantza Santestebanek, Tonia Noyabrovak eta Ion Borșek– Donostia Zinemaldiaz gain, nazioarteko zirkuituko beste lehiaketa batzuetan estreinatu dituzte beren lanak. Selman Nacar zuzendariaren Tereddüt çizgisi / Hesitation Wound filma –2022an WIP Europa Industria Saria eta WIP Europa Saria irabazi zituena– Veneziako zinema-jaialdiaren Orizzonti sailean estreinatuko da. Informazio gehiago nahi izanez gero, kontsultatu hemen.
SARIAK
WIP Europa Industriaren Saria. Honako enpresa hauek ematen dute: Best Digital, BTeam Pictures, Deluxe Content Services Spain, Dolby Labs., Laserfilm Cine y Video, Nephilim producciones eta No Problem Sonido. Film baten postprodukzio-zerbitzuetan datza saria –ingelesez eta gaztelaniaz azpititulaturiko DCP kopia egin arte- eta filmaren banaketa Espainian.
WIP Europa Sariak 10.000 euro emango dizkio WIP Europa Industria Sariaren film irabazlearen ekoizle nagusiari.
Nadinek lantegi batean egiten du lan, eta Paul lankidearen askotariko itxurak ezagutzen hasten denean, harekin maiteminduta dagoela ohartuko da. Urte batzuk geroago, maitasuna lausotu denean, Nadinek bere begirada propioa zalantzan jarriko du. Europako meatze-eskualde zabalenean girotua, Mannequins (behin-behineko titulua) maitemintzearen magiari eta maiteminduta egoteari uzteko prozesu mingarriari buruzko drama bat da.
Robert Wyatten musika eta bizitzan inspiratua, Rock bottom Boben eta Alifen arteko maitasun-istorio autosuntsitzailea da. 70. hamarkadaren hasierako hippy kulturaren zurrunbilo sortzaile eta apurtzailean murgilduta dagoen artista bikote gazte honentzat, drogek uda sutsua amesgaizto bihurtuko dute, baita Wyattek bere musikan jorratzen dituen bidaiak bultzatu: sorkuntza artistikoaren euforia eta larritasuna, drogekiko lilura inkontzientea, errutinarekiko desengainua eta degradazio fisiko eta mentala.
Afganistango gerra zibila lehertzear dagoela, betidanik adiskideak izan diren Surayak (komunista eta diruduna) eta Simak (umila eta musulmana) beren bizi-erabakiak eta printzipio moralak zalantzan jarri beharko dituzte, asaldura politikoaren kontrako aldeetan nahastu ondoren.
Bogi kantu-ikasle talentudunak diru pixka bat irabazten du bere lehengusuaren seme-alabak zainduz. Lehengusua bikote-krisian dagoelarik, neskak ezin izan zion laguntza ukatu. Azken azterketa-egunean, haurrekin dagoela, txikienak hozkailuko iman bat irentsiko du ustekabean. Bogi, izuturik, ez da ausartzen haurraren gurasoei istripuaren berri ematera. Egunak aurrera egin ahala, obsesionatu egingo da gertakariarekin, eta seguru dago haurra hil egingo dela. Burua galtzen hasiko da, bere burua zigortu behar duela sinetsi arte.
Deniz bere herrira itzuli da ama alargunaren bigarren ezkontza dela-eta. Bisitaldian gainditutzat jotzen zituen haserrea, beldurra eta errua berpiztuko zaizkio. Amak familia-etxetik alde egiten duenean, bizitako tragediak berriro jazarriko du Deniz, itsasoan itotako aitarengan pentsatzeari utzi ezinik. Gainera, ziur dago bere amak zorigaiztoko istripuaren errua botatzen diola eta horregatik egin duela ihes. Halaber, ama ez bezala, konturatuko da ezingo duela aurrera jarraitu bere arazoei aurre egin arte. Eztabaida baten ondoren, Deniz bere iraganarekin adiskidetuko da eta prest egongo da bere gaztaroa atzean uzteko. Bakea sentitzen du itsasoari begira, jada ez baitu arriskutzat jotzen, askapen sinbolotzat baizik. Azkenik, uretan murgiltzea erabakiko du.
WIP Europa ekimena Best Digital, BTeam Pictures, Deluxe Content Services Spain, Dolby Iberia, Laserfilm Cine y Vídeo, Nephilim Producciones eta No Problem Sonido taldeen laguntzari esker atera daiteke aurrera.
Industria Saila ondorengoen babesarekin
Bideoak
Irudiak
Astelehenetik ostiralera: 09:00 - 14:00 | 16:00 - 19:00.