Zinemira-Euskal Zinemaren Panorama izango da gehienbat euskaldunek ekoitziriko edo euskaldunek eginiko zinemari Donostia Zinemaldian presentzia handiagoa emango dion atal berriaren izena. Orain arte Euskal Zinemaren Egunak hitzordu zehatz bat eskaintzen zuen eta film bakoitzaren pase bakarra egiten zen. Hemendik aurrera, zabaldu egingo da eta Zinemaldiaren beste sail bat gehiago izango da, urteko uztaren emaitza nabarmenen artean aukeraturiko filmak bilduko dituena.

Zinemira-Euskal Zinemaren Panorama Donostia Zinemaldiak eta Eusko Jaurlaritzaren Kultura Sailak antolatu dute, EITBren babesletzarekin eta Ibaia eta APV ekoizpen etxeen elkarteen laguntzarekin. Saila Zinemaldiaren programazio orokorraren barruan bilduko da eta edizio osoan zehar eskainiko da. Estreinatuko diren sei filmak hiru aldiz emango dira, eta dagoeneko zinema komertzialetan estreinatu direnak bi aldiz.

Gainera, Zinemiraren programazioak Kimuak 2009ko katalogo berriaren lehenengo proiekzioa ere izango du, urteko euskal film labur onenen aukeraketa biltzen duena. Kimuak Eusko Jaurlaritzaren programa da eta Euskadiko Filmategiak kudeatzen du. Haren helburua euskal film laburrak sustatzea eta munduan zabaltzea da. Proiekzio hori profesionalentzat baino ez da izango.

Euskal Zinemaren gala eta Zinemira Saria. Asteazkena 23

Zinemira-Euskal Zinemaren Panorama sailaren programazioaren barruan sartzen da Victoria Eugenia antzokian ospatuko den Euskal Zinemaren gala. Patxo Telleríak eta Aitor Mazok zuzenduriko La máquina de pintar nubes izango da galan estreinatuko den lana. Filmean, bestalde, Aitor Mazo, Gracia Olayo, Bingen Elortza, Lander Otaola eta Santi Ugaldeizangok parte hartuko dute.

Imanol Uribe zuzendariak Zinemira Saria jasoko du datorren edizioan Victoria Eugenia antzokian egingo den Euskal Zinemaren galan. Sari horrek, euskal zineman garrantzia izan duten artisten ibilbidea nabarmentzen du.

Imanol Uribe (San Salvador, 1950) euskal zinemak 70ko hamarkadaren amaieran izan zuen gorakada garaian ezagutu genuen zuzendari garrantzitsuenetako bat da. Zuzendari lanez gain, gidoilari eta ekoizle gisa ere aritua da. El proceso de Burgos (1979) lanarekin, jada, Gaztelaniazko Film Onenaren Kantauriko Bitxia saria jaso zuen Donostia Zinemaldian. Garaiko egoera politikoarekin loturiko La fuga de Segovia (Segoviako ihesa, 1981) eta La muerte de Mikel lanen ondoren beste genero batzuk landu ditu eta Espainiako zinema garaikidearen izenburu nabarmenenetako batzuk eskaini dizkigu: Adiós pequeña (1986), El rey pasmado (1991), Donostia Zinemaldiaren Urrezko Maskorra irabazi zuten Días contados (1994) eta Bwana (1996), edo Plenilunio (1999) eta La carta esférica (2007) idazlanen egokitzapenak.