• Lurra sariak, hain zuzen, ingurumenaren eta bakearen babesa hoberen adierazten dituen Donostia Zinemaldiko filma sarituko du
  
  
• Irailaren 25ean emango da saria, aktoreak eta zinemaren munduko jendea gau batez aktibista bihurtuko dituen zeremonia batean
  
  
• Irailaren 21ean jakinaraziko dira film hautagaiak, "Greenpeace erara"; 23an zinemako set bat jarriko da, eta ekintza bat irudikatzeko gonbita luzatuko zaio jendeari

Dagoeneko erabaki da zer epaimahaik aukeratuko duen Lurra sariaren irabazlea; sariak, hain zuzen, ingurumenaren eta bakearen babesa hoberen adierazten dituen Donostia Zinemaldiko filma sarituko du. Barbara Goenaga aktoreak, Álvaro Longoria ekoizle eta zuzendariak, Carlos del Amor kultur-kazetari eta idazleak eta Laura Pérez kazetari eta Greenpeaceko Komunikazioko zuzendariak hautatuko dute film irabazlea.

Irailaren 25ean egingo den ekitaldi batean banatuko da saria. Zeremonia horretan, gau batez, ingurumen-aktibista bihurtuko dira aktoreak eta zinemaren munduko kide ugari, sorpresaz beteriko ekitaldi batean non zinema eta aktibismoa uztartuko baitira.

Sariak banatzeko zeremoniaz gain, Zinemaldiaren astean hainbat jarduera gauzatuko dira zinemak aktibismoan duen balioa nabarmentzeko, bai eta ingurumenaren eta bakearen babesaren alde jendea mugiarazteko duen gaitasuna ere. Irailaren 21ean ("Greenpeace erara") jakinaraziko dira hautagai izango diren filmak. Irailaren 23an, erakunde ekologistak egun batez aktibista bihurtzeko gonbita luzatuko die herritarrei: set bat jarriko du eta jendeak aukera izango du ekintza betean argazkia ateratzeko.

Epaimahaikideak:

Barbara Goenaga
Aktorea. Oso txikitatik parte hartu du telebistako eta zinemako produkzioetan. Euskal Telebistako telesail ezagunetan agertu da: esaterako, Goenkale arrakastatsuan. Gaztea izan arren, ibilbide egitekotsua izan du lanbidean. Ia hogei telesailetan hartu du parte (besteak beste, Cuéntame eta Amar es para siempre), bai eta hamar bat filmetan eta hainbat antzezlanetan ere. Goya sarietarako izendatua emakumezko aktore berri onenaren kategorian, eta Aktore Batasunak saritua. Koldo Serraren Gernika filma eta Ben Sharrock-en Pikadero ditu estreinatzeko, eta azken hori Donostia Zinemaldian aurkeztuko dute.

Álvaro Longoria
Zinema-zuzendari eta -ekoizlea, eta Morena Films etxearen sortzailea. Hark ekoitzitakoak dira Steven Soderberghek zuzendutako Che filma, Benicio del Toro duela protagonista; Julio Medemen film berria, ma ma, Penelope Cruzekin, eta Hugh Hudsonen Altamira, Antonio Banderas duela protagonista. Dokumentalak egin ditu, halaber: Oliver Stone-ren Comandante, eta Longoriak berak zuzendutako Hijos de las Nubes, la última colonia, Javier Bardemekin. Azken horri esker, Goya sari bat irabazi zuen. Bere dokumental berria, The Propaganda Game, Donostia Zinemaldian estreinatuko da aurten.

Carlos del Amor
Kultur-kazetaria. Bere ibilbide profesionala RTVEko albiste-zerbitzuen Kultura sailarekin lotuta dago. Telediario saioan informazioa emateko ikuspegi berezia duela-eta, kazetaritzaren munduko ahots pertsonal, ezagun eta jarraituenetakoa da. Hainbat irratsaiotan dihardu kolaboratzaile gisa, eta gaurko gaiei buruzko ikuspegi desberdina eskaintzen du horietan. Mundu osoko zinema-jaialdi nagusiei estaldura emateaz arduratu da eta kulturaren munduko izen handi askori egin dizkie elkarrizketak. 2013an kontakizun-liburu bat argitaratu zuen, La vida a veces; 2015ean, berriz, El año sin verano eleberria.

Laura Pérez
Greenpeaceko Komunikazioko zuzendaria. Kazetaria, hedabideetan hasi zuen bere ibilbide profesionala. Solidaritateari, giza eskubideei eta ingurumenari buruzko programa espezializatuetan parte hartu zuen irratian, Radio Voz eta Radio España kateetan. Prentsan, Diario 16-eko solidaritate-orriez arduratu zen hiru urtez, eta, telebistan, Tele5 eta Globomediarentzat egin zuen lan. Gizarte eta ingurumen arloko kazetaritzarekin engaiatua, Greenpeacen lan egiten du 2002 urtetik.