Gaur, 62. Donostia Zinemaldian, datorren irailaren 19tik aurrera, ikusi ahal izango diren Espainian ekoitzitako pelikulak aurkeztu dira, Espainiako Arte eta Zientzia Zinematografikoen Akademiaren egoitzan. Zinemaldiko zuzendari José Luis Rebordinosek eta Zuzendaritza Batzordeko kide Maialen Belokik sail bakoitzean aurkeztuko diren pelikulen berri eman dute.
Interes handiena piztu duten aurtengo pelikuletako batzuk Zinemaldian izango dira. Jon Garaño eta Jose Mari Goneaga, Alberto Rodríguez eta Carlos Vermuten lan berrienak Sail Ofizialean lehiatuko dira; Isaki Lacuesta eta Pablo Maloren pelikula berriak, berriz, lehiaketatik kanpo aurkeztuko dira.
Bestalde, Roberto Castón eta Hermes Paralluelo Kutxa-Zuzendari Berriak sarirako hautagai izango dira. Ohikoa denez, Zabaltegi sailak ere Espainian ekoitzitako dokumental, fikziozko film luze eta film labur sorta bat barne hartuko du. Horizontes Latinos eta Perlak sailetan, hiru koprodukzioren Espainiako estreinaldia egingo da, eta beste bi film aurkeztuko dira, emanaldi berezien bidez eta Belodromoan.
Alberto Rodríguezek (Grupo 7) berriz ere zinema beltzari heldu dio, Raúl Arévalo, Javier Gutiérrez eta Antonio de la Torre protagonista dituen thriller honekin. Ideologikoki aurkakoak diren bi poliziari espedientea irekiko diete eta paduretako herri urrun batera, bi neraberen desagerketa ikertzera, joatera zigortuko dituzte. Han, hiltzaile basati bati aurre egin beharko diote, iraganari tinko atxikirik dagoen komunitate batean.
Carlos Vermuten (Diamond Flash) film berria bidean gurutzatuko diren patuen istorio bat da, eta José Sacristán, Bárbara Lennie eta Luis Bermejo ditu protagonista. Alicia, gaixo dagoen eta Japoniako Magical Girl Yukiko telesaileko soinekoarekin amesten duen neskatila bat; Luis, haren aita, soinekoa lortzeko ahal duena egingo duena; Bárbara, buruko nahasmenduak dauzkan gazte erakargarri bat; eta Damián, bere tormentuzko iraganetik ez beste gauza guztietatik erretiratutako irakasle bat. Guztiak xantaia ilunen sare batean harrapatuta geratuko dira, non sena eta arrazoia tragikoki borrokatuko diren.
Jon Garaño eta Jose Mari Goenaga hiru emakumeren, lore sorta batzuen presentzia hutsak alteratutako hiru bizitzaren inguruko istorio honekin lehiatuko dira Sail Ofizialean. Loreek ahaztuta ziruditen sentimentuak piztuko dituzte emakumeengan...
Pablo Malok Lasa eta Zabalaren benetako kasua berregin du bere pelikula berrian; hau da, 1983an bahitu, torturatu eta hil zituzten bi euskal iheslariena. Hamabi urte geroago, Iñigo eta Fede abokatuak hiltzaileak identifikatzeko borrokatuko dira, beren sinesmenak arriskuan jarriz, baita beren bizia bera ere.
Isaki Lacuestak satira sozial bat aurkeztuko du. Filmean, krisi ekonomikoak gurearekin antzekotasun bitxia daukan herrialde bateko bost herritar arrunten bizitza suntsituko du. Galtzeko ezer ez daukatela, Espainiako eta munduko ekonomia salbatzeko plan zoro bat egingo dute: Banku Zentraleko presidentea bahitu, eta dena lehengo egoerara itzultzeko exijitzea. Aktore multzoa egundokoa da: Sergi López, Ariadna Gil, Emma Suárez, Raúl Arévalo, Imanol Arias, Eduard Fernández, José Coronado, Jordi Vilches, Josep Maria Pou, Ángela Molina eta Albert Pla, beste askoren artean.
Icíar Bollaín egileak, dokumental honetan, atzerrira lan bila joan behar izan duten hainbat espainiarren egoera kontatzen du. Gloria da Espainiatik krisiaren eraginez irten behar izan duten 700.000 lagun horietako bat. Plazarik gabeko irakaslea da Gloria, 32 urteko almeriarra. Edinburgen lan egiten du azken bi urteetan. Gloriak eta berak sustatuko kolektibo batek ekintza bat ipini dute abian: «Ni perdidos ni callados» leloarekin, beren frustrazioa adieraztea dute xede. Hala, Eskoziako hiriburuan bizi diren 20.000 espainiar horiek, parte hartu nahi badute, beren ahotsa entzunarazteko aukera izango dute.
Bere film berrian, Hermes Paralluelok maitasunezko istorio bat kontatzen digu. Protagonistek, Antoniok eta Felisak, elkarrekin 60 urte baino gehiago daramatzatenean eta beren osasun makalak elkar zaintzea eragozten dienean hasiko da maitasun istorioa. Zaharren egoitza batean bizi behar izatea mehatxu gisa agertzen da horizontean. Filmak zahartzaroko maitasuna irudikatzen du; bakardadearen, heriotzaren eta maitearengandik urruntzearen beldur lo-kuluxkak egiten emandako gauak. Bizitza besteren esku utzi eta independentzia galtzearen beldurra.
Roberto Castónen bigarren film luzea da; aurrekoa, Ander, Berlingo Panorama sailean lehiatu zen, 2009an. Mario, Paula, Miguel eta Lourdesen bideak gurutzatu egingo dira, gustuko ez duten bizitza bati irtenbidea bilatzen dioten bitartean (batzuek beste batzuek baino gehiago). Horrek dela bihotzari dela aldatzeko beldurrari jaramon eginda erabakiak hartzera behartuko ditu. Prozesu horretan, pelikulako zuzendariaren laguntza izango dute. Roberto Álamok jokatuko du rol hori.
Iazko Zinemaldian, Zinema Eraikitzen saileko Industriaren Saria irabazi zuen film honek. Argentinan etorkin berriek bizi duten esperientziaren inguruko mosaiko bat da. Bakardadearen eta deserrotzearen aurka borrokatzen diren hainbat arrazatako pertsonaiei buruzko hiru istorio dira, «La Salada» azokaren inguruan kokatuak.
Japonia, Frantzia eta Espainiaren arteko koprodukzio bat da; Espainiaren kasuan, Eddie Saetaren ekoizpen-etxeak parte hartu du. Naomi Kawasek zuzendu du eta aurtengo Cannesko zinema-jaialdian lehiatu da. Amami-Oshima uharte subtropikalean, 16 urteko gazte batek, Kaikok, gorpu bat itsasoan flotatzen ikusiko du. Bere lagun Kyoko aurkikuntza misteriotsu hori argitzen laguntzen saiatuko da. Elkarrekin, heldu bilakatzen ikasiko dute.
Espainiaren eta Argentinaren arteko koprodukzio bat da (Espainiaren kasuan, El Deseo ekoizpen-etxeak parte hartu du), eta aurtengo Cannesko zinema-jaialdiko Sail Ofizialean estreinatu dute. Berdintasun ezak, bidegabekeriak eta bizi dugun munduaren exijentziak estresa edo depresioa eragiten diote jende askori. Batzuk lehertu egiten dira.
Basilio Martín Patinok bederatzi gutun bidali zizkion Bertari 1966an. Ia berrogeita hamar urte geroago, Virginia García del Pino hamargarrena idazten saiatu da. Basilio Martín Patinok eta biek partekatutako gutuna, nortasun iheslariaren erretratua. Patinok berak emandako aginduan oinarrituta, «egin behar denari buruzko manu guztiak ahaztea», Bertari 1966an idatzi zion ikasle errebelde harengandik zer geratu den aztertzen du (gutun horien inguruko filma Martín Patinoren zinema-ibilbide bikainaren hasiera izan zen).
Borja Cobeagaren komedia berriko protagonista Manu Aranguren da, ETArekiko negoziazioetan Espainiako Gobernuaren mintzaide gisa aritzen den euskal politikaria. Laster, ekintza serio eta ondo pentsatua izan ordez, elkarrizketa kasualitateek, akatsek edo gaizki-ulertuek baldintzatuko dutela ikusiko da. Ramón Barea, Carlos Areces eta Josean Bengoetxea dira protagonistak.
Dokumental hau ez da Paco de Lucíaren bira baten jarraipen fisiko hutsa, haren arimarako hurbilpen bat baizik: haren oroitzapenetarako hurbilpena, nahigabea, interesa edo aho betean barre egitea eragiten zioten gauzetarako hurbilpena. Flashbacken bitartez, Paco de Lucía bera narratzaile bakarra dela, haurtzarotik azken egunetarainoko tartea kronologikoki aletzen du. Mallorcan eman zituen azken egunak, hain zuzen ere, hil ondorengo diskoko azken moldaketak egiten.
Dokumentalean, aktoreak 1989ko Donostia saria jasotzeko Donostia Zinemaldira egin zuen bisita berregiten da: nola prestatu zen agur esateko eta zer arrasto utzi zuen berarekin harremanetan egon zirenengan.
Umetan sorgin-orratzekin amestu zuen eta bere ametsa beteta hil zen motor arloko aitzindari baten istorioa.
Lur lehorra, eguzkia, haizea. Prozesio batek zeharkatuko du paisaia. Haren otoitzen oihartzunak euria ekarriko du.
Mireni, kafea ordaintzerakoan, askotan txandapasa egiten diote. Baina bere dendatik norbaitek alkandora bat lapurtu duela konturatzen denean beste behin etsipenean erortzeko ez dago prest.
Aita, zonbia naiz animaziozko filmaren ondorena da. Dixieri dena ondo joaten hasten zaionean, bere aspaldiko lagun zonbiak agertuko dira eta albiste txarrak emango dizkiote: zonbiak gizakien aurka matxinatu dira eta Nigreda da haien burua. Azoth-a daukanez, Dixiek bakarrik geldiaraz dezake. Noren alde egingo du Dixiek?