Gaur goizean Donostia Zinemaldiak eta Kontseiluak euskaraz bizi nahi dut film laburren lehiaketaren edizio berri bat aurkeztu dute. Aurkezpenean Kontseiluko idazkari nagusiak, Paul Bilbaok, eta Zinemaldiko zuzendariak, Jose Luis Rebordinosek, parte hartu dute.

Paul Bilbaok film laburren lehiaketa azken urteotan Kontseilua sustatzen ari den euskaraz bizi nahi dut dinamika orokorraren baitan kokatu du. "Lehiaketaren helburua euskaraz bizi nahi dut ideia ahalik eta gehien hedatzea da, horrela, kasu honetan hizkuntza zinematografikoa erabiliz, gero eta norbanako gehiagok ideia hori bere egin dezaten, gero eta jende gehiagok euskaraz bizitzeko hautua egin dezan, dakitenek hitz eginez eta ez dakitenek ikasiz" adierazi du Bilbaok. Zentzu horretan, lehiaketara aurkezten diren lanek helburu hori bete beharko dute.

Gaiari dagokionez, film laburrek euskaraz bizitzeko nahiari buruz hitz egin beharko dute: motibazioak, oztopoak, pozak, etsipenak, konplizitateak... azken finean euskaraz bizi nahi dugunean izaten ditugun sentipenak. "Hori guztia hizkuntza zinematografikoaren bidez, era bizi eta freskoagoan kontatzen lagunduko diguten laburrak nahi ditugu" adierazi du Kontseiluko ordezkariak.

Aurtengo edizioan sari hobeak eskaintzeko ahalegin berezia egin dugu eta bi atal bereizi ditugu, bat profesionalentzat eta bestea amateurrentzat. Profesionalen atalean 3.500 euro arteko sariak izango dira eta amateurren atalean 1.750 euro artekoak; "hori bai, egileak berak erabakiko du zein ataletara aurkeztu nahi duen bere lana" argitu du Paul Bilbaok. Lanak aurkezteko azken eguna 2014ko irailaren 8a izango da.

Zinemaldiko zuzendariak bestalde, eremu guztietan euskararen erabilera eta normalizazioa sustatzeko honelako ekimenen garrantzia azpimarratu du, kasu honetan bereziki zinema munduan. "Gero eta film gehiago egiten dira euskaraz eta gero eta ikusle gehiagok ikusten du zinema euskaraz. Dinamika hau sustatzen jarraitu behar dugu" adierazi du Rebordinosek.

Zinemaldiak badaki oraindik asko dagoela egiteko "baina bidea ibilian egiten da eta pausoak ematen ari gara, bidea egiten ari gara" gaineratu du Zinemaldiko zuzendariak. Euskaraz bizi nahi dut film labur lehiaketarekin Zinemaldiak abiatu duen elkarlana dinamika horren baitan kokatzen da, pauso bat gehiago da beste batzuen artean; zinema munduan euskara sustatze aldera Zinemaldia garatzen ari den ekimenen artean bat gehiago.

Zentzu honetan, lehiaketara aurkezten diren lan onenen proiekzioa zein sari banaketa Donostia Zinemaldiko 62. edizioaren baitan ospatuko dira, irailean, Zinemaldiak erabili ohi dituen aretoetako batean. Era berean, zinema munduko ordezkariez gain Zinemaldiko ordezkari batek eta Kontseiluko beste batek osatuko dute film laburren lehiaketako epai-mahaia.

Bukatzeko, gogoratu nahi izan dute lehiaketari buruzko informazio guztia (laburren iraupena, formatuak, epea, epai-mahaia...) ondorengo atarian aurki daitekeela: http://www.euskarazbizinahidut.org