Zinemira-Euskal Zinemaren Panorama da gehienbat euskaldunek ekoitziriko edo euskaldunek eginiko zinemari Donostia Zinemaldian presentzia handiagoa ematen dion atalaren izena eta urteko uztaren emaitza nabarmenen artean aukeraturiko filmak biltzen dituena.

Zinemira-Euskal Zinemaren Panorama Donostia Zinemaldiak eta Eusko Jaurlaritzaren Kultura Sailak antolatzen dute, EITBren babesletzarekin eta Ibaia eta APV ekoizpen etxeen elkarteen laguntzarekin. Saila Zinemaldiaren programazio orokorraren barruan biltzen da eta edizio osoan zehar eskaintzen da.

Euskal Zinemaren Gala Victoria Eugenia Antzokian egingo da, irailaren 22an. Txaber Larreategik eta Josu Martínezek zuzenduriko Prohibido recordar/ Debekatuta dago oroitzea filma estreinatuko da galan.

Álex Angulo aktoreak Zinemira Saria jasoko du aurtengo edizioan Victoria Eugenia antzokian egingo den Euskal Zinemaren Galan. Sari horrek, euskal zinemarentzat garrantzia duen artista baten ibilbidea nabarmentzen du.

Álex Angulo (Erandio, 1953) euskal aktorerik ezagunenetako bat da. Karrera 1971n hasi zuen, Bilboko Cómicos de la Legua antzerki talde independentearekin. 1980an Karraka taldean sartu zen. Zineman egin zuen lehen lana Segoviano ihesa (1981) izan zen, 2009ko Zinemira saridun Imanol Uribek zuzendua. Álex de la Iglesia lagun-minarekin El día de la bestia egin zuen 1995ean eta rol horri esker Aktore Onenaren Goya sarirako izendatu zuten. Une horretatik aurrera zineman, telebistan eta antzerkian lan egiteko proposamenak jasotzen hasi zen. Blas Castellotek, Periodistas telesaileko pertsonaiak, ospe handia eman zion. Zuzendari gazteekin onginahi hutsez gehien lan egin duen aktoreetako bat da eta hainbat eta hainbat film laburretan parte hartu du. 2010eko Zinemaldiko Sail Ofizialean Óscar Aibar zuzendariaren El Gran Vázquez filma aurkeztuko du.