Basque Culinary Centerrek, Donostia Zinemaldiak eta Berlingo nazioarteko zinema-jaialdiak «Culinary Zinema: Zinema eta Gastronomia» sailaren programazioa aurkeztu dute gaur, abuztuak 3. Prentsaurrekoan izan dira Thomas Struck, Berlingo zinema-jaialdiko «Culinary Cinema» saileko arduraduna, Joxe Mari Aizega, Basque Culinary Centerreko zuzendaria, eta José Luis Rebordinos, Donostia Zinemaldiko zuzendaria.

«Culinary Zinema: Zinema eta Gastronomia» sailaren lehendabiziko edizioak oso harrera ona izan zuen iaz. Arrakasta hori ikusirik, Donostia Zinemaldiaren 60. edizioak gastronomia hizpide duten zazpi luzemetrai eta laburmetrai bat programatu ditu. Emanaldi bakoitzaren ondoren, afari tematikoak izango dira, sukaldari eta jatetxe garrantzitsuenetakoek prestatuta.

«Culinary Zinema: Zinema eta Gastronomia» saila Donostia Zinemaldiaren, Berlingo nazioarteko zinema-jaialdiaren eta Basque Culinary Centerren arteko lankidetza da. Helburua zinema eta gastronomia elkartzea da, kontuan izanda, batetik, Donostia Zinemaldia FIAPFen kategoria goreneko lehiaketa-jaialdia dela, eta, bestetik, metro koadroko Michelin izar gehien dituen lurraldea dela.

Aurten, zortzi film programatu dituzte: sei film luze eta film labur bat estreinatuko dira, eta Gabriel Axelen Babettes gaestebud (1987) filma berreskuratuko da. Film horrek atzerriko film onenaren Oscar saria irabazi zuen 1988an.

FILMAK

EGITARAUA

SUKALDARIAK

Aizpea Oihaneder eta Xabi Díaz, Xarma jatetxea
Aizpeak eta Xabik hamar urte baino gehiago daramatzate elkarrekin lanean; Badajozko Rocamador preziosistan Michelin izar bat lortu zuten, eta, orain, Donostian, sukaldaritza fina eta abangoardiakoa oinarri duen proiektua dute, funts sendoduna eta produktuaren bikaintasunarekin arduratsua.

Roberto Ruiz, Tolosako Frontón jatetxea
Tolosako Frontón jatetxeko sukaldaria da orain dela hogei urtetik. Bere jatetxea produktuaren tenplu bilakatu du. Plateren jatorria ikertu eta kalitatea lantzen du ekoizleekin, eta, ostean, sentikortasun izugarriarekin eraldatzen ditu osagaiok.

Mikel Gallo, ni neu jatetxea
Mikelek hurbiltasun bokazioa duen sukaldea zuzentzen du. Eta bete-betean lortu du lortu ere: keinu tradizionaletan oinarrituta, teknika garaikideak eta oso pertsonalak erabiltzen ditu sukaldean. Emaitza bikaina eta ulergarria da, eta bat dator ni neu jatetxearen inguru bereziarekin. Hurbileko bikaintasuna.

Ruben Trincado, Mirador de Ulía jatexea
Mirador de Ulía jatetxeko chef eta jabea. Michelín izar bat lortu zuen 2010. urtean. Abangoardia ikur hartuta, etorkizuna nondik joango den erakusten duen chefetako bat da.

Bruno Oteiza, Biko jatetxea (Mexiko Hiria)
Oso gazterik hasi zen sukaldean, eta gutxi dira bere prestakuntza eta ibilbidea duten profesionalak; izan ere, chef garrantzitsuak eta etxe handiak izan ditu irakasle eta lantoki. Juan Mari Arzakekin bide du antzekotasun handiena, Mexikon hainbat proiektutan lan egin baitute elkarrekin. Brunok bi jatetxe ditu: D.O., Pablo San Románekin batera, eta Biko, munduko 50 onenen artean dagoena. Biak ala biak ere Mexikon.
Hedabideetan maiz ikus daitekeen sukaldaria da, baina, ororen gainetik, kultura mexikarraren eta euskal kulturaren arteko benetako zubi eta erreferente da.

Josean Eizmendi, Illarra jatetxea
Illarra erretegia erreferente bilakatu da parrillarekin lan egiten duten jatetxeen artean. Izan ere, azken urteotan izugarri garatu diren tekniken eskutik, erretegien sektoreak iraultza bizi izan du. Josean teknika berritzaile horien aitzindari da, eta bere ekarpena onartua eta saritua izan da. Sukaldari berritzailea da, irekia, jatunari irakasteko bokazioa duena. Horrez gain, izugarri zorrotza da eskaintzen dituen produktuen kalitatearekin.

Iñigo Lavado, Iñigo Lavado jatxea (Irun)
Sukaldari gaztea da, baina dagoeneko ibilbide profesional oparoa egindakoa. Jatetxe handietan trebatu ostean, proiektu egonkorra osatu du. Lan egiteko eta kudeatzeko modu berriak esploratzeko prest da beti. Lavadoren Singular kontzeptua eredu aitzindaria da, zentzu guztietan.

Mikel Santamaria, Bokado Aquarium jatetxea
Aquariumeko Bokado jatetxean lan egiten du Mikelek. Jatetxe bikaina da, eta ez bakarrik bere ikuspegi paregabeengatik, baita bertako proposamen gastronomikoengatik ere. Sukaldaritza modernoan zein abangoardiakoan esperientzia luzea du Mikelek, baina baita kalitate ezin hobeko zerbitzuak eskaintzen ere.

Luis Arévalo, Madrilgo Nikkei 225 jatetxea
Luis Arévalo perutarrak Madrilgo jatetxe pribilegiatu batean lan egiten du; pribilegiatua bai kokalekuarengatik, bai espazioaren arkitektura eta dekorazioagatik.
Luis Arévaloren sukaldaritzak lerro propioari jarraitzen dio; oso landua, Peruko tradizio eta kulturan errotua, Japoniako sukaldaritzarekin fusioan. Arévaloren elaborazioek autentikotasuna eta pertsonalitate handia dute ezaugarri. Nikkei sukaldaritza izenez ezagutzen denaren proposamen pertsonal eta ebolutiboa.