“Savage Cinemak” Victoria Eugenia Antzokian emango dio hasiera hirugarren edizioari, irailaren 18an (ostirala), Steve McQueen: the Man & Le Mans dokumentalaren emanaldiarekin. Filmaren zuzendarietako batek aurkeztuko du; hain zuzen, John McKennak, dokumentala Canneseko zinema-jaialdian estreinatu zuenak.

Donostian izango dira, halaber, Rafa Ortiz eta Rush Sturges, Chasing Niagararen protagonista eta zuzendaria, hurrenez hurren. Kayaker batek Mexiko, AEB eta Kanadan zehar egingo duen odisea kontatzen du filmak. Baita Guido Perrini eta Xavier De Le Rue ere, Degrees North proiektuko buru den goi mendiko freerider-a. Azkenik, Jon Herranz, Robert van Wingerden eta Victor van Vloten-ek osatzen dute Donostian izango diren zuzendarien zerrenda.

Amaiera-saioa irailaren 25ean izango da, Kursaal 2an, non Michael Oblowitz-ek Heavy Water aurkeztuko baitu. Agertoki ezin hobea, olatu handiko surfaren munduko bi pertsonaia karismadun horiek gurean hartzeko.

“Savage Cinemak” eta Bilbao Mendi Film Festival jaialdiak, beste urtebetez, 2013an hasitako lankidetzari eutsiko diote; helburua da urteko mendiko film prestigiotsuenak aurkeztea.

Programazio osoa irailaren 12an kontsulta dezakezu.
Sarrera-txartelak irailaren 13an jarriko dira salgai, www.sansebastianfestival.com webgunean.

Guido Perrini, Degrees North filmaren zuzendaria
Guido Perrini ekintza-kiroleko kameralari nabarmenetakoa da gaur egun. Alor horretan, goi mendiko atleta eta enpresa nagusiekin egin du lan. Azken urteotan Into the Minden eta Point breaken remakearen gisako proiektuetan aritu da. Gaur egun, Timeline Missions abentura-kirolen ikus-entzunezko ekoiztetxeko kidea da.

John McKenna, Steve McQueen: The Man & Le Mans filmaren zuzendaria
John McKennak, Gabriel Clarkerekin batera, dokumental hauek zuzendu ditu: Clough, 2009an, Grierson sarietarako izendatua; When Playboys Ruled the World (2011) eta The Fight of Their Lives (2011), BAFTA sarietara izendatua. Era berean, hainbat dokumental filmatu eta ekoitzi ditu Erresuma Batuko telebistarako, eta 13 urtez lan egin zuen ITV Sport katean.

Jon Herranz, Panaroma filmaren zuzendaria
Jon Herranzek mendi-eskaladari eta aire zabaleko kirolei buruzko film labur eta web-serieak zuzendu ditu, muturreko kirolei buruzko EpicTv kanalarekin lankidetzan. Panaroma (2015), Novato (2014) eta Restart (2014) eskalada-dokumentalen egilea da. Gai soziopolitikoei buruzko dokumentalak ere egin ditu: Sikyong. La revolución política del XIV Dalai Lama (2014) eta Flames (2013), adibidez. Namuss Films ekoiztetxea sortu zuen Gerard Peris-ekin batera.

Michael Oblowitz, Heavy Water filmaren zuzendaria
70eko eta 80ko hamarkadetako New Yorkeko No Wave mugimenduan parte hartu zuen, eta New Yorkeko Arte modernoaren museoko bilduma iraunkorrean ikusgai daude haren lehen lanak. Akzio-filmak zuzendu ditu: The Foreigner eta Out for a Kill, esaterako (Steven Seagal da bietan protagonista). 2010ean, surfari buruzko Sea of Darkness dokumental ikonikoa zuzendu zuen.

Rafa Ortiz, kayakerra eta Chasing Niagara filmeko protagonista
Rafa Ortizek, Mexikon ikasi zuen arraunean, baina Kanadan perfekzionatu zuen bere teknika; 2005ean, Freestyleko Mundu Txapelketan lehiatzen zen lehen mexikarra bihurtu zen. Ur-jauzietako piraguista onenetakoa da nazioartean, eta Red Bull Chasing Waterfalls proiektuan parte hartu du; hain zuzen, ibaibide, ibai eta ur-jauzi ezezagunak aurkitzeko proiektu bat da.

Rush Sturges, kayakerra eta Chasing Niagara filmaren zuzendaria
Rush Sturges, munduko kayaker berritzaileenetakoa bera, 30 herrialdetan baino gehiagotan ibili da arraunean 16 urterekin profesional bihurtu zenetik. Lehiaketak eta muturreko arrauna batetik, eta ekoizpen zinematografikoa bestetik: biak uztartzen ditu. Sturgesek bere film guztiak ekoizten ditu, eta bera da ere protagonista eta musikagilea.

Xavier De Le Rue, freeridera, snowboardera eta Degrees North filmeko protagonista
Teknikari eta estiloari bagagozkio, Xavierren snowboardinga ezin finagoa da. Hirutan irabazi du freeride kategoriako mundu-txapelketa, eta naturaren eremu hotzenenganako maitasuna igortzen jarraitzen du, txapelketetan eta film sarituetan parte hartuz, eta filmatze-teknika berriekin txundituz.

Victor van Vloten eta Robert van Wingerden, Paul filmaren zuzendariak
Victor van Vloten proiektu independenteetan aritu da, Rudolf Borgart zinemagilearekin, eta dozena bat film labur eta dokumental zuzendu eta idatzi ditu. 2009an Arteffects publizitate-agentzia sortu zuen, Robert van Wingerden freelance kameralari eta What About Her bidaia-blogaren egilearekin.

www.sansebastianfestival.com
twitter.com/sansebastianfes // @sansebastianfes
instagram.com/sansebastianfes // @sansebastianfes
facebook.com/sansebastianfestival
#63SSIFF