Foroan parte hartzeko izena eman zuten 181 proiektuetatik hamalau hautatu dira. Proposamenak, 22 herrialde ezberdinetatik iritsi dira, gehienak Latinoamerikakoak: Argentina, Belgika, Bolivia, Brasil, Txile, Kolonbia, Costa Rica, Kuba, Ekuador, El Salvador, Espainia, Frantzia, Guatemala, Mexiko, Panama, Peru, Puerto Rico, Dominikar Errepublika, Erresuma Batua, Suedia, Uruguai eta Venezuela.

Horrez gain, Donostia Zinemaldiaren eta Ibermedia programaren arteko elkarlanaren fruitu, Erdialdeko Amerika eta Karibeko proiektu zinematografikoak garatzeko tailerraren baitan hautatutako egitasmo batek ere hartuko du parte Koprodukzio Foroan.

Europa-Latinoamerika Koprodukzio Foroa Eusko Jaurlaritzako Ekonomiaren Garapen eta Lehiakortasun Sailak eta Industria, Energia eta Turismo Ministerioak sustatzen dute.

Aurreko edizioetan bezala, hautatutako proiektuen artean ibilbide oparoko zuzendari eta ekoizpen-etxeen egitasmoak zein zuzendari eta ekoizpen-enpresa berrienak daude. Kontuan izan behar da 2012an Koprodukzio Foroan izan ziren hamazazpi egitasmoetatik bederatzi ekoitzi direla jada. 2013an izandako hamaseietatik, berriz, hiru filmatu dira jada eta beste sei filmaketa lanak hasi zain daude.

Koprodukzio Foroa eta Zinema Eraikitzen ekimenak egun berberetan izango dira, Zinemaldiko hiru egun hartuz; hortaz, Donostia ikus-entzunezkoen industriaren ezinbesteko hitzordu bilakatuko da egun horietan.

Hala, proiektuen arduradunek euren egitasmoak nazioarteko industriako profesionalei aurkezteko aukera izango dute hiru egunez, eta elkarren arteko bilera ugari egingo dituzte. Foroan balizko koproduktore, finantza partner eta salmenta-agenteekin harremanetan jartzea izango dute helburu egitasmoon bultzatzaileek; hau da, proiektuak finantzatu, ekoitzi eta nazioartean banatzea ahalbidetuko dieten bazkideak bilatzen ahaleginduko dira. 2013ko edizioan, proiektuen arduradunen eta industriako profesionalen arteko 461 one to one bilera egin ziren, 2012an egindako 365 bilerak baino askoz gehiago beraz.

Aurtengoan, bigarren urtez, Europa-Latinoamerika Koprodukzio Foroko Proiektu Onenaren EGEDA saria emango da, 10.000 eurokoa. Hain zuzen ere, EGEDA-k Ikus-entzunezko Ekoizleen Eskubideak Kudeatzeko Erakundeak babesten du saria.

Koprodukzio Foroak Canneseko zinema-jaialdiko Marché du Film azokarekin eta Argentinako INCAA Zinema eta Ikus-entzunezko Arteen Institutu Nazionalarekin dituen akordioen harira, Donostian izango diren egitasmoetako batzuek euren nazioarteko ibilbidea jarraitu ahal izango dute finantzazio bila, hurrenez hurren Canneseko Producers Network egitasmoko hurrengo edizioan eta Argentinan, Ventana Sur merkatuan parte hartuz. Ibilbide horrek nabarmen lagunduko die egitasmooi nazioartean oihartzuna izaten.

Aurtengo berrikuntza gisa, Donostia Zinemaldiak arreta berezia eskainiko dio Kanadari, herrialde horretako Telefilm Canada korporazioarekin lortutako akordioari esker. Hala, Kanadako hamabi produktorek osatutako ordezkaritza bat Donostian izango da Zinemaldia ezagutzeko, kontaktu profesionalak egiteko eta Koprodukzio Foroan zein Industry Club sailak antolatutako gainontzeko jardueretan parte hartzeko.

Informazio gehiago lortzeko:
industryclub@sansebastianfestival.com
sansebastianfestival.com

---

Sustatzaileak:

Laguntzaileak:

---

Babesleak: